Comunidad Chines na Aruba ta reuni 42 palet di ayudo pa Venezuela den tres dia: Prome Minister Mike Eman a bishita Aruba New China Club y gradici e muestra di solidaridad cu e pueblo Venezolano

Dialuna mainta, Prome Minister mr. Mike Eman a bishita Aruba New China Club Cooperative Association, unda e comunidad Chines na Aruba ta reuni un gran cantidad di donacion di producto di prome necesidad pa e pueblo Venezolano. Durante e bishita, e Prome Minister a mira di cerca e esfuerso cu nan a haci y a combersa cu William Ng, vocero di Aruba New China Club, y cu Grislynn Hernandez, director di Fundacion VeneAruba Solidaria.

Den solamente tres dia, e iniciativa a logra reuni 42 palet di mercancia cu lo wordo manda pa Venezuela. E donacionnan ta consisti di alimento, awa, producto di higiene personal y otro articulo esencial pa esnan afecta pa e temblor di diaranson ultimo.

Prome Minister Mike Eman a destaca cu e respuesta di e comunidad Chines ta un ehempel di con Aruba ta uni den momento di necesidad. “Pa nos, esaki ta un momento unda comunidad ta bin hunto. Comunidad di tur nacionalidad cu ta biba Aruba ta respondiendo riba e gran necesidad cu tin na Venezuela. Awe nos ta mira e comunidad Chines desplegando un sentido di solidaridad hopi grandi. Hopi di nan tin tambe relacionnan familiar cu Venezuela, loke ta haci e sentimento aun mas fuerte.”

El a agrega cu e accion ta demuestra e compromiso di e diferente comunidadnan na Aruba pa yuda esnan cu mas mester. William Ng a splica cu despues di un reunion urgente, Aruba New China Club a haci un yamada na comerciante, famia y miembro di e comunidad Chines pa contribui cu nan donacionnan.

“Den tres dia nos a logra reuni 42 palet. Tur hende a duna un man. Tin cu a contribui cu mercancia, tin cu a yuda cu trabou y tin tambe cu a haci donacion di placa.” Segun Ng, e donacionnan ta inclui, entre otro, hariña pan, aros, sucu, buscuchi, awa, cuminda den bleki, alcohol pa limpieza, handschoen, mop y diferente otro producto di prome necesidad. El a indica cu e colecta ta sigui y cu nan ta spera cu mas donacion lo yega den e siguiente dia venidero.

Durante su bishita, Prome Minister Eman a gradici e comunidad Chines pa nan compromiso. “Den nomber di Gobierno di Aruba y tambe den nomber di e pueblo Venezolano, hopi danki comunidad Chines na Aruba. Boso ta forma parti di Aruba pa hopi aña y, hunto cu boso esfuerso, nos por brinda un alivio na e pueblo Venezolano.”

Actualmente, Aruba New China Club ta trahando cu diferente partner pa coordina e transporte di e donacionnan pa Venezuela. Entre e opcionnan cu ta wordo considera tin transporte maritimo, cu lo permiti e mercancianan yega na e area cu tin mas necesidad.

Prome Minister Eman a informa tambe cu e mision medico di Aruba na Venezuela ta sigui desaroya. Segun e ultimo informacion, e profesionalnan Arubiano cu a yega Venezuela ya a cuminsa traha den e hospitalnan temporario, mientras cu Gobierno di Aruba ta coordina e siguiente grupo di personal medico cu lo bay reforsa e asistencia den e area di emergencia.

Director di Fundacion VeneAruba Solidaria, Grislynn Hernandez, a expresa su aprecio pa e iniciativa di Aruba New China Club y pa e solidaridad cu e comunidad Arubiano ta continua mustra na e pueblo Venezolano. El a indica cu e apoyo cu Aruba ta reuni den e ultimo dianan ta representa un importante muestra di speransa pa e famianan cu a wordo afecta.