Comunidad ta sigui duna color nobo na Bernhardstraat: Boluntarionan, residente y Gobierno ta uni pa sigui transforma San Nicolas

Prome Minister Mike Eman ta continua cu e accion di verf casnan den Bernhardstraat, unda boluntarionan, residente y miembro di comunidad a reuni un biaha mas pa sigui duna e bario un apariencia nobo y fortalece e sentido di orguyo den San Nicolas. Hunto cu e diferente boluntarionan, Prome Minister Eman a participa activamente den e trabounan di verf y a expresa su gratitud pa tur esnan cu ta dedica nan tempo y energia pa haci e iniciativa aki un exito. “Cada dia tin mas boluntario cu ta bin yuda nos. Esaki ta mustra con comunidad ta haci su mes dueño di e proyecto bunita aki pa Bernhardstraat. Tur e casnan cu ta haya un color nobo ta forma parti di e caracter autentico di San Nicolas,” segun Prome Minister Eman. 

El a indica cu e cambio den e cayanan ta bay mas leu cu solamente verf casnan. “E parti cu ta yena bo corason di calor ta ora bo drenta Bernhardstraat y bo mira con tur e edificionan historico ta haya un bida nobo, un color fresco. Esaki ta mehora calidad di bida den henter e bario y ta crea un espiritu di optimismo y speransa.” Prome Minister Eman a señala cu e iniciativa ta enca den e tradicion Arubiano di prepara casnan pa fin di aña. “Nos ta bay drenta fin di aña y nos kier cu tur hende por sinti orguyo di nan cas. Cada siman cu pasa tin mas hende cu ta yuda y mas famianan cu ta bira parti di e proyecto grandi aki.”

Glenda Thomasia di Ministerio di Asuntonan General, kende ta un di e personanan cu ta coordina e accion di verf cas den Bernhardstraat, a expresa su satisfaccion cu e entusiasmo cu comunidad ta mustra pa e iniciativa. Segun Thomasia, cada siman mas residente y boluntario ta uni nan mes na e proyecto. “E ta duna un bon sintimento ora un residente ta bisa: ‘Mi cas mester un tiki verf’, y ora nos por yuda cu limpia rond di e cas pa prepara tur cos prome cu cuminsa verf. Aun mas importante ta e apoyo cu nos ta ricibi di hopi hende. Tur siman tin persona cu ta yama pa ofrece verf, rol, kwashi y otro material. Esaki ta confirma cu e proyecto no ta solamente di Bernhardstraat, sino di Aruba.” Thomasia a enfatisa cu e meta final ta beneficia henter e isla. “Turistanan no ta bin solamente Bernhardstraat, nan ta bin Aruba. Pesey e proyecto aki mester ta un proyecto di Aruba. Mi ta hopi contento di mira con tanto empresa, organisacion y ciudadano ta ofreci nan apoyo pa haci e proyecto aki sigui crece.” 

Un di e residente cu a beneficia directamente di e accion ta Francis Ramon Ferrera, kende ta biba na Bernhardstraat 240. Despues cu su cas a wordo geverf, el a expresa su gratitud pa e iniciativa y pa tur esnan cu ta dedica nan tempo pa mehora e bario. “Mi ta sinti hopi orguyoso di Prome Minister Mike Eman. E ta un ministro cu ta duna tur loke e por pa su pais. Tur dia e kier mira su isla mas bunita. El ta lucha pa Aruba sigui crece y pa nos tur por sinti orguyo di nos isla.” Ferrera tambe a gradici Glenda Thomasia pa su dedicacion y e manera cu el a acerca e habitantenan pa nan forma parti di e proyecto. “Mi ta hopi agradecido cu Glenda a acerca mi y a puntra mi si mi tabata di acuerdo pa verf e cas. Mi a bisa cu si, pasobra esaki ta algo cu nos mester. Aruba ta un isla turistico y no ta di un persona so, e ta di nos tur. Nos mester cuida Aruba, comporta nos mes, sigui lucha y sigui traha hunto pa nos pais.”

E accion di verf e casnan den Bernhardstraat ta forma parti di e esfuerso continuo di Gobierno di Aruba pa trece mehoracion den San Nicolas. Cu e apoyo di e boluntarionan, residente, empresa y e organisacionnan, e iniciativa ta sigui converti Bernhardstraat den un ehempel di con comunidad y gobierno por traha hunto pa logra un Aruba mas bunita.