Gobierno di Aruba ta gradici e comunidad cu a responde na e yamada, y a brinda sosten na e Jamaican Relief Donation Drive. Diasabra ultimo Prome Minister mr. Mike Eman a asisti na YMCA San Nicolas, caminda e actividad tabata tumando luga.
Premier Eman consciente di e daño grandi cu e horcan Melissa a ocasiona na Jamiaca, a delibera den algun reunion cu e Consul Honorario di Jamaica pa asina por yega na aglun concepto di ayudo cu por a haci, cual e donation drive tabata un di nan.
Muestra di e curason grandi di e Rubiano tabata bisto, a drenta diferente donacion durante dia. E comunidad Jamaiquino tambe a demostra nan sosten pa nan rumannan na Jamaica y hunto a logra recauda basta producto cu lo yega pronto cerca damnificadonan.
Pronto lo ta den combersacion cu Prome Minister di Jamaica pa asina expresa solidaridad y ayudo for di Aruba. Premier Eman a expresa su palabra di forsa y consuelo na e comunidad di Jamaica cu e destruccion y perdida lamentabel cu nan a pasa aden.
Contacto estrecho lo continua, ayudo y sosten lo sigui durante dianan dilanti y ta gradici tur cu di un forma of otro a/ta brinda nan ayudo na e comunidad Jamaiquino den e momentonan dificil aki.
