Comunidad ta uni na Plaza Simon Bolivar pa colecta ayudo pa Venezuela: Prome Minister Mike Eman ta aplaudi iniciativa di boluntario y ciudadano cu ta kier yuda esnan afecta pa e temblor fuerte

Diadomingo atardi, Prome Minister Mike Eman a pasa bishita na Plaza Simon Bolivar na Oranjestad, unda varios boluntario y miembro di comunidad Venezolano na Aruba a organisa un accion di colecta pa yuda e personanan afecta pa e temblor fuerte na Venezuela. E iniciativa a reuni producto di prome necesidad manera paña, awa, remedi, alimento y otro articulo esencial pa e famianan cu a keda sin cas, personanan herida y esnan cu ta pasa door di un momento hopi dificil. Parlamentario Clifford Heyliger tambe a sigui situacion na Venezuela di cerca y ta solidario cu e iniciativa di Prome Minister Mike Eman pa haci tur esfuerso pa Aruba por a manda diesun boluntario pa Venezuela. E tabata presente diadomingo atardi na e plasa y mustra su aprecia pa tur e trabou cu e comunidad ta haciendo pa yuda esnan mas afecta pa e temblor di diaranson ultimo na e pais bisiña.

Prome Minister Eman a destaca cu Aruba ta sinti e tragedia di Venezuela hopi di cerca, pa motibo di e relacion historico, familiar y hermandad cu ta existi entre ambos pais. “Nos ta para aki pa duna sosten na un iniciativa di e boluntarionan y e ciudadanonan di Aruba cu tin nan curason cerca di Venezuela. Hopi a nace na Venezuela, hopi tin famia y amistad ey nan, y nos tur ta sinti un preocupacion grandi pa e tragedia enorme cu Venezuela ta pasando,” Prome Minister Eman a bisa. Segun Prome Minister, e accion na Plaza Simon Bolivar ta un muestra di solidaridad y convivencia entre Aruba y e comunidad Venezolano. “No tin miho forma pa pone un pleister riba e herida grandi aki cu uni como pueblo, como pais y como ciudadano, pa mira con cada un por aporta pa yuda esnan cu tin necesidad den e momento aki,” el a señala.

Gradicimento na e comunidad di Aruba pa e apoyo grandi cu a demonstra pa Venezuela

E accion ta wordo coordina pa Luisa Rincon-Peterson di Expresion Folclorica Viva Venezuela y Grupo di Baile Casas di Colombia, kende durante hopi aña ta activo den comunidad Latino na Aruba. E iniciativa na Plaza Simon Bolivar ta parti di diferente centro di colecta y accionnan comunitario cu ta tumando luga rond di Aruba. “Esaki ta un oportunidad hopi grandi. Nos ta ricibi un apoyo sorprendente. Hopi hende a contacta nos pa bisa con nan por yuda. Nos ta pidi sosten di tur hende cu por aporta, sea cu remedi, paña, producto di prome necesidad of material cu por uza paketa,” el a bisa. Segun Peterson, e organisacion tin coordinacion pa manda e ayudo na dos lugar den Venezuela. E compania local Elvis Cargo lo brinda apoyo logistico pa transporte di e materialnan colecta. Na Plaza Simon Bolivar, e colecta ta sigui te den anochi, mientras cu tin varios otro centro di colecta na Aruba cu tambe ta ricibi donacion.

Apelacion na comunidad pa sigui apoya e esfuersonan pa ayudo humanitario

“Den momentonan asina, nos mester uni, nos mester brasa otro y nos mester mustra calor humano. Cualkier aporte por haci e situacion un tiki menos dificil pa hopi hende cu ta sufri na Venezuela,” Prome Minister Mike Eman a indica. E bishita diadomingo atardi na Plaza Simon Bolivar ta bin den cuadro di e esfuersonan mas amplio cu Aruba ta haci pa brinda asistencia na Venezuela. Awe mainta, Gobierno di Aruba, den coordinacion cu Ministerio di Defensa, Cruz Cora Aruba y Crisis Management Office (CMO), a facilita salida abordo avion di wardacosta di un prome ekipo di asistencia humanitario pa brinda cuido medico y apoyo na e personanan afecta na La Guaira.

Gobierno di Aruba ta sigui traha hunto cu Cruz Cora Aruba y otro partner pa coordina ayudo medico, logistico y humanitario. Prome Minister Eman a indica cu, mientras e prome ekipo di boluntario ta traha na Venezuela, Gobierno ta sigui evalua otro forma di apoyo, incluyendo posibilidad di un accion mas amplio hunto cu Cruz Cora Aruba den e dianan cu ta bin pa colecta mas material di prome necesidad cu lo por manda pa e pais bisiña via barco di marina Hulandes.