Gobierno di Aruba a haci entrega awe di concepto di ley, un handicapten uitkering, pa mayornan cu muchanan special. Esaki a tuma luga den Sala di Conseho di Minister, na man di Prome Minister di Aruba mr. Mike Eman y colega Minister di Asuntonan Social drs. Mervin Wyatt-Ras.
Ambos minister a cuminsa e tema aki for di su comienso, na inicio for di parlamento, a traha hunto un concepto di ley pa introduci un cambio den e sistema di bijstand pa muchanan cu un cierto limitacion/deshabilidad cu nan y/of nan mayornan por haya un compensacion, como cu na e momentonan aki nan no ta cubri den e bijstand landsverordening di Aruba.
Esaki ta necesario mirando e necesidad cu ta constata cerca mayornan, ta locual cu Premier Eman a indica. Gasto envolvi cu muchanan cu limitacion ta hopi mas grandi cu locual comunidad ta mira. E ta un reto grandi.
Na momento cu a haci entrega di e concepto di ley aki, e tempo ey den parlamento, ambos minister a keda pusha y manda diferente carta pa e minister concerni e tempo ey pero e ley no tabata avansa.
Tanto Minister Eman como Minister Wyatt-Ras a sigui traha y haci bishita na varios instituto y asina percura pa tin suficiente conocemento di e nececidad, cu na momento cu ta den gobierno por traha e ley den un forma perfecciona riba e nececidad cu tin.
Di momento cu a drenta gobernacion 28 di maart (diabierna), pa e siguiente dialuna a inicia e trabounan y bou direccion di Minister Wyatt-Ras, hunto cu un comision, a traha riba e ley y awe por haci entrega di esaki.
Premier Eman a expresa di ta sumamente contento di por bisa cu den e presupuesto 2026 aproba den parlamento, tin un suma caba poni pa por introduci e ley aki riba fecha di prome di juni 2026.
Minister di Salubridad, Asunto Social, Cuido di Adulto Mayor y Maneho di Adiccion Wyatt-Ras tambe di su banda ta gradici Prome Minister pa a traha hunto y duro pa e concepto di ley aki. En berdad a haya oportunidad di reuni cu diferente instancia, scol, mayornan prome cu a sinta como gobierno y netamente manera a drenta den gobernacion a start e proceso de inmediato pa medio di landspakket, caminda a haya un Wetgevingsjurist Jill Bangert, cu a brinda un sosten enorme na e proceso aki.
Deseo di Minister Wyatt-Ras tabata di ricibi e concepto di ley aki como regalo di Pasco, si ta logra e por a bira un regalo di Sinterklaas y tin di bisa cu Jill Bangert a cumpli, pa dia 5 di december e draft concept tabata riba mesa. E concepto final a pasa den Conseho di Minister y cu aprobacion y su landsbesluit, ademas di suma disponibel den presupuesto, ta haci entrega awe di e concepto di ley na Dienst Wetgeving en Juridische Zaken (DWJZ) den man di George Croes. Tin cu pasa su proceso, den analisis, conseho y duna contesta pa asina e ley por cana su caminda pa Raad va Advies, pa despues drenta parlamento pa aprobacion.
“Un momento hopi emocionante”, ta locual cu Minister Mervin Wyatt-Ras a expresa. Un concepto di Ley cu a bay lihe.
E ley aki lo beneficia nos muchanan/hobennan special inmensamente. E ley anteriormente tabata basa riba edad di 16 aña bay ariba, mientras cu e concepto nobo aki lo ta di edad di 0 te cu 18 aña. Na momento cu e mayor haya un yiu y cu a constata cu e tin cierto limitacion, e por haci peticion pa yega na e handicapten uitkering, particularmente na muchanan special cu mester di cuido intensivo.
E handicapten uikering aki lo yuda na cubri diferente gasto, manera entre otro cuminda special, test, terapia, cuido (opvang) debi na atencion special cu hopi ta rekeri di dje. Den algun caso tin cierto adaptacion na cas en debi na ekipo special cu e yiu lo ta depende di dje.
Pa locual ta trata e suma, ministernan a informa cu esaki lo bira un suma basico di 500 florin pa cada mucha y na tur mucha cu haci peticion di e uitkering. E ta un base como inicio, mirando cu esaki lo tin cu bay mira e registro pa prome biaha. Adaptacion di e suma lo ta den evaluacion y si ta necesario lo tin adaptacion segun e cantidad di mucha cu lo drenta.
Un stap grandi pa inclusion. Hopi di e muchanan no por yega scol, recrea, ta parti den comunidad como cu transporte, mobilisacion y/of necesidad a pone cu e no tabata posibel, pero cu e sosten aki e lo yuda pa cada mucha ta inclui den nos sociedad.
Premier Eman a indica tambe cu mirando cada famia su reto y necesidadnan durante nan bishita den bario, hopi ta mayornan cu tin cu kita di trabou pa asina atende cu yiunan special como cu no tin otro manera pa haci. Entrada di e famia aki ta bira un reto aun mas grandi, peso financiero ta cay hopi pisa riba nan. E compensacion aki sigur lo bay yuda hopi.
Na momento cu tin yiu special na cas, e reto cu ta bin acerca ta for di dokter special, logopedista, psikiatra, psicologo, cual ta gastonan cu den nan mayoria no ta wordo cubri door di AZV, caminda cu e ayudo aki lo ta uno sumanete importante pa e famianan.
Ta spera di haya reaccion y registracion manera e ley aki drenta na vigor entrante prome di juni 2026, cu e mayornan aplica na e uitkering aki y asina poco poco haya un bista mas amplio di cantidad y necesidad pa asina den e siguiente presupuesto tene cuenta cu e cifranan real, cu na e momento aki ta basta dificil pa calcula pa motibo di e diversividad y complicacionnan cu por tin cerca e grupo aki.
