Fundacion Bernadina Growell-Kock, conhuntamente cu Fundacion Chico Harms y cu sosten di Fundacion Padu Lampe, ta presenta Concierto Nacional di Gala 2026 – Festival Un Canto na Bernadina, Edicion Special di 15 Aña.
Festival Un Canto na Bernadina ta celebra su edicion special di 15 aña cu presentacion di 17 artista local. Entre nan tin seis ganador di edicionnan anterior di e festival y 11 artista invita special.
Awe mainta, durante un conferencia di prensa celebra na Cas di Bernadina Growell-Kock, Nos Mama di Cultura Aruba, a presenta oficialmente e Concierto Nacional di Gala 2026: Festival Un Canto na Bernadina – Edicion Special di 15 Aña.
E concierto ta un homenahe nacional dedica na dos figura extraordinario cu a engrandece patrimonio musical y cultural di Aruba: Bernadina Growell-Kock, Nos Mama di Cultura Aruba, y Juan “Chabaya” Padu Lampe, Nos Tata di Cultura Aruba, ambos den feliz memoria. E gala ta forma parti di e programa cultural den cuadro di celebracion di Dia di Brazil 2026.
Durante e conferencia di prensa, Fundacion Bernadina Growell-Kock a enfatisa cu Festival Un Canto na Bernadina no ta solamente un evento musical, sino tambe un proyecto cultural cu tin como meta preserva, promove y transmiti e legado musical y humano di Bernadina Growell-Kock. Na mes momento, e festival ta brinda atencion special na nos musica, nos compositornan local y talento di diferente generacion.
Fundacion Chico Harms a destaca cu e edicion special aki lo uni historia, memoria, identidad y orguyo nacional. E publico lo por disfruta di composicionnan di Bernadina Growell-Kock y Juan “Chabaya” Padu Lampe, interpreta pa artistanan local reconoci. Seis di e artistanan participante ta ganador di Festival Un Canto na Bernadina durante añanan anterior, mientras cu 11 ta artista invita special.
Tur cantante lo wordo acompaña pa un orkesta musical bou di direccion di maestro Danny Koolman.
Un programa musical cu 17 interpretacion
E anochi lo inicia cu un acto oficial, incluyendo Himno Nacional “Aruba Dushi Tera”, interpreta pa Jerwin Hernandez, sigui pa palabranan di bon bini y apertura ceremonial.
Cada cancion lo wordo introduci cu un poema cortico, prepara especialmente pa e ocasion, conectando e audiencia cu historia, emocion y mensahe di cada obra. Durante e gala tambe lo tin reconocementonan special y momentonan di gratitud dedica na e dos baluartenan di nos cultura, nan famianan y fundacionnan.
| ARTISTA | CANCION |
|---|---|
| Antonieta Ras-Booi | “Pilar” |
| Whitney Nin | “Sonrisa di un Baby” |
| Maria Christina Petrocchi | “Loco Loco” |
| Stephanie Quant | “For di Dia M’a Mira Bo” |
| Betty Werleman | “Ayo Mi Dudu” |
| Bertha Wolff-Croes | “Na un Distancia” |
| Rachel Kraaivanger | “Boca di Tribon” |
| Giliani Wester | “Macuto di Boca Dushi” |
| Jetzenia Martines | “Un Sonjo” |
| Jerwin Hernandez | “Nami un Chance” |
| Raquel Lampe | “Mosa di Nos Alma” |
| Rodrick “Rocco” Franken | “Ban Bail’e Danza” |
| Amy Richards | “Min’sa” |
| Jelitza Croes | “Hamaca” |
| Nicole Martines de Kort | “Ayera” |
| El Duque Victor Samuel | “Abo So” |
| Robert Maduro | “Locura di Dalia” |
Informacion di e evento
| Evento | Concierto Nacional di Gala 2026 – Festival Un Canto na Bernadina |
| Fecha | Diasabra, 8 di augustus 2026 |
| Orario | 7:00 p.m. |
| Luga | Centro di Bario Brazil |
| Entrada | Afl. 25; ticketnan tambe lo ta disponibel na entrada |
E portanan lo habri for di 6:00 p.m. Pa cumpra ticket por pasa entre diaranson y diabierna, for di 7:00 p.m. pa 8:00 p.m., na Centro di Bario Brazil. Por yama tambe na number di telefon 562-5429 pa haci reservacion.
Ticket lo ta disponibel tambe e dia di e Concierto di Gala. Busca di bo na tempo pa bo ta sigur di bo entrada.
Un danki special ta bay na tur partner y patrocinador pa nan valioso aporte y sosten: Aruba Tourism Authority, ASTEC, Departamento di Cultura Aruba, SETAR, ELMAR, UNOCA, Balashi, Rayo, Fundacion Bernadina Growell-Kock, Fundacion Padu Lampe y Fundacion Chico Harms.
| Pa Departamento di Cultura Aruba ta un honor di por brinda su aporte y sosten na e Concierto Nacional di Gala aki, dedica na Nos Mama y Tata di Cultura Aruba. E homenahe ta representa un momento importante pa reconoce, conserva y transmiti e legado di dos gran baluarte cu, cu nan talento y dedicacion, a contribui profundamente na formacion di nos identidad cultural. |
Un invitacion cordial ta bay na henter comunidad arubiano pa forma parti di e anochi memorabel aki, apoya nos artistanan y celebra e rikeza di nos patrimonio musical.
“Un pueblo cu ta conserva su cultura, ta conserva su identidad;
un pueblo cu ta canta su historia, ta garantiza su futuro.”
