Gobierno di Aruba ta invita pueblo di Aruba pa sintonisa

Diamars awo lo wordo transmiti na canalnan di television y pagina di Facebook di Gobierno e ‘Conferencia 35 aña Status Aparte – Aruba Ta Di Nos Tur’. Pa motibo cu mester tene cuenta cu e medidanan di COVID-19, ta limita e cantidad di invitadonan y lo transmiti ‘Live’ pa asina Pueblo di Aruba por disfruta di un programa dedica na e lucha di nos Status Aparte.

E aña aki ta conmemora cu 35 aña pasa Aruba a haya su Status Aparte dentro di Reino Hulandes. Dia 1 di Januari 1986, Aruba a drenta e Status diferente aki y esaki ta locual cu a contribui na e exito di Aruba. Diferente Gobierno y Parlamento, un tras di otro a contribui na e exito cu awe nos tur ta biba aden, nos dushi Aruba.

Durante e conferencia aki lo reflexiona riba e 35 añanan cu a transcuri, lo analisa unda nos tabata, unda nos ta y unda nos lo kier yega como pais. 35 aña di Status Aparte a trece nos caminda cu nos ta awo pero ta hunto nos mester determina con nos ta duna contenido na e futuro di Aruba y su Status Aparte.

Lo elabora riba kico Status Aparte a nifica pa Aruba, kico tur nos a logra y con nos ta awor. Tambe lo analisa con Aruba a desaroya riba tereno economico, social, educacional y cultural.
Lo tin como invitado representantenan di diferente sector y varios ex-mandatario cu a ocupa posicionnan importante durante e ultimo 35 aña cu a transcuri.

Prome Minister Evelyn Wever- Croes den nomber di Gobierno di Aruba ta invita pueblo di Aruba pa sintonisa e programa aki, diamars dia 23 di november di 9’or pa 12’or di merdia via TeleAruba, Canal 22, Diario TV y pagina di Facebook di Gabinete Wever-Croes.

LEAVE A REPLY

Please enter your comment!
Please enter your name here