ORANJESTAD – Dialuna ultimo a tuma luga un conferencia special pa conmemora 35 aña di nos Status Aparte cual a resulta un exito. E programa aki lo wordo ripiti durante fin di siman y pa e motibo aki Gobierno di Aruba ta invita comunidad pa sintonisa mayan diasabra y tambe diadomingo ripiticion di e Conferencia 35 Aña Status Aparte – Aruba Ta Di Nos Tur. Esaki lo wordo pasa mayan diasabra 27 di november pa 12 di merdia na Telearuba, pa 3:30 PM na Canal 48, Diario TV y pa 7 or di anochi na Canal 22. Riba diadomingo 28 di november 2021, e programa lo wordo pasa pa 10 or di mainta na Canal 22 y pa 9:30 di anochi na Telearuba.
E programa aki ta repasa brevemente e historia di e Status Aparte di nos Pais y su protagonistanan. Un mainta na unda cu grandi y hoben a haya oportunidad pa expresa nan opinion riba Aruba su Status Aparte y con nan ta wak Aruba den futuro. E panelistanan di profesionalnan di Aruba a duna un bista di con nan a experencia nos Status Aparte, con nan ta wak cu Aruba a desaroya den 35 aña di tempo y con nos Pais lo mester sigui desaroya e siguiente añanan nos dilanti.
