Siman pasa, Taskforce Bestuurlijke Aanpak Aruba (TBAA) a organisa e prome conferencia di maneho publico tocante Bibob na Aruba. Un conferencia practico, dirigi na profesionalnan den sector publico cu ta sostene maneho di Aruba, Curaçao, Sint Maarten, Boneiro, Saba y Sint Eustatius. E conferencia ta yama: “E forsa di Bibob, for di legislacion te resiliensia. Oportunidadnan y dilemanan Caribense ora scoge pa un ley Bibob como instrumento administrativo contra minamento.”
Minamento ta ora criminalnan ta uza hende y negoshinan honesto pa actividadnan ilegal, manera labamento di placa, fraude y traficacion di hende. Hopi biaha nan ta presiona hende pa yuda nan. Tin ora criminalnan ta purba haya influencia riba gobierno. Asina nan ta purba maluza nos comunidad pa beneficio propio. Esaki ta causa mas insiguridad, daño economico y menos confiansa den gobierno. Ademas, companianan honesto mester competi cu placa criminal, haciendo nan bida mas dificil.
Gobierno kier pa ciudadanonan, negoshinan y funcionarionan publico bira mas consciente di minamento y su consecuensianan negativo pa comunidad. Tambe nan kier fortifica e administracion publico y desaroya instrumentonan pa por preveni y combati minamento miho. Un di e instrumentonan por ta un lei Bibob (ley pa promove evaluacion di integridad door di sector publico) cu por duna gobierno e posibilidad pa preveni cu permisonan, subsidionan of contratonan yega den man di esnan conecta cu actividad criminal. Asina ta posibel pa stroba infiltracion criminal den economia na nivel publico. Bibob ta un instrumento administrativo cu tin hopi potencial den e manera administrativo pa combati minamento, pero e ta un instrumento compleho y ainda relativamente desconoci den Caribe.
Aruba y e islanan BES ta tumando pasonan caba pa yega na un ley asina. E conferencia di maneho di sector publico aki a trata tocante oportunidatnan, pasonan y dilemanan cu ta surgi ora un pais ta scoge pa Bibob. Minister di Hustisia, Integracion y Energia, sr. mr. drs. Dowers, a habri y cera e conferencia y a dirigi su mes na e participantenan.
Durante dos dia, e participantenan a comparti nan ambicion y vision tocante posibilidadnan huridico pa combati minamento na nivel administrativo. Hunto cu expertonan for di Hulanda a haya experiencia practico cu Bibob door di trata ehempelnan di casonan concreto. Tambe a investiga pasonan pa maneho den contexto local, y a descubri puntonan comun, posibilidadnan pa colaboracion y obstaculonan pa comparti informacion den Reino.
E Taskforce Bestuurlijke Aanpak ta un asociacion di colaboracion entre varios servicionan publico di Aruba pa realisa accionnan administrativo contra minamento, fortifica posicion di informacion y haci campañanan di consientisacion. Partnernan fiho ta, entre otro, KPA, OM, Bureau di Ministerio di Husticia, VDA, FIU, Landsrecherche, Bureau Integriteit Aruba (BIA) y DEZHI (DEACI).
