Lider di Movimiento Electoral di Pueblo (MEP) y parlamentario, Evelyn Wever-Croes, a participa na e Foro Internacional di e organisacion di partidonan politico di Latino America COPPPAL riba Colonisacion y Decolonisacion. E foro a conta cu participacion di Republica Dominicana, Argentina, Puerto Rico, Belize, Mexico, Boneiro, Curacao y Aruba. President di comitee di colonisacion y decolonisacion di COPPPAL Joe Koolman, a dirigi e foro.
Den su discurso Lider di partido MEP a declara cu Aruba ta enfrentando “un menasa directo contra su autonomia” cu e proposicion di ley di Reino conoci como HOFA.
Den su discurso na Cede Libertador Betico Croes, e ex Prome Minister a recorda e lucha di Betico Croes y di MEP, cu a logra e Status Aparte den 1986, ora cu Aruba a bira pais autonomo den Reino Hulandes. “Ta e autonomia ey a trece desaroyo, stabilidad y bienestar pa nos pueblo. Loke nos a conquista cu tanto sacrificio, nos no por perde awor cu imposicion for di Den Haag debi cu nos tin lidernan den nos pais cu ya a entrega caba,” el a bisa.
Den su discurso Evelyn Wever-Croes a recorda cu Hulanda a presta Aruba placa “na un interes haltisimo di 6.9%” y cu awor kier baha e interes solamente si Aruba ta entrega mas control financiero. “Aruba ya a mustra cu por recupera pa su mes. Nos a haci bon, y nos no mester entrega nos instrumento financiero den man di un organo cu no sa kiko pa haci cun’e,” el a afirma.
Lider di MEP a critica e gobierno actual di Aruba pa aceptacion di condicionnan di Hulanda sin consulta cu pueblo ni Parlamento. P’esey MEP ta hibando un campaña di firma contra e HOFA. Lider di MEP a elabora tambe kico ta e consecuencianan di e ley aki pa e ciudadano di pais Aruba.
“Colonisacion no ta cos di pasado. E ta pasando awendia ainda, no mas den otro forma. Ya no mas cu cayon of cadena, sino cu imposicion, y kitamento di autoridad di paisnan. Aki na Aruba nos ta bibando e lucha aki awor. Nos ta bisa no na HOFA, no na imposicion, si na dialogo y respet mutuo,” Evelyn Wever-Croes a conclui bisando.
