Ora nos ta confesa nos pica na Dios y pordona nos prohimo, tin gran beneficio tanto mental como spiritual.
Na prome lugar nos lo restaura nos relacion cu Dios, y tambe nos mente ta yega na un pas.
Si nos warda pica den nos curason:
Y keda venga cu hende,
keda pleita,
keda rabia,
keda papia tur dia riba mesun cos, nos no ta crece den ningun sentido.
Pero amargura lo drenta nos curason y danja nos bida, y henter nos hogar, pasobra negativismo lo tuma over, y nos lo no tin control riba dje.
Nada no ta scondi pa Senjor, pero nos mester confesa, pa asina nos comunicacion cu Dios, ta completo.
David a bisa den Salmo 66:18; Si mi a warda pica den mi curason Senjor lo no a tende mi.
Dios kier pa nos confesa y pordona prome cu nos haci oracion.
Den Marco 11:25 ta para scirbi: Ki ora cu boso ta haci oracion, pordona si boso tin algo contra algun hende, pa boso tata cu ta den cielo tambe pordona boso , boso transgreshonnan.
E asunto di sigi biba, no wak atras, haci malo y no arepenti, pleita y no pidi despensa, ta crea un mal custumber cu ta hala nos for di Dios y tambe for di hende.
Nos ta bibando den un tempo cu hende a bira superman, super sabi, cu hende no kier wordo coregi, pasobra tur cos nan sa miho, y asina bo ta coregi hende, nan no ta gusta bo mas.
Pero lamentablemente, hende no por biba sin disiplina y coreccion. Dios ta displina esun cu E ta stima, pa asina e persona por crece y ta un bon sirbido di Dios.
Pero den tu hogar caminda no tin disiplina y coreccion, poco poco e resultado negativo lo sali pa dilanti, cu consecuencia grave, pasobra locual no a wordo para for di chikito, na grandi e ta bira dificil.
Den un cas caminda esnan cu ta biba cu otro mester sinja pordona otro, e asunto di biba den mesun cas, un yiu ta yega for di trabao pasa bay direct den camber pasobra e no kier papia cu su ruman, ta un cos diabolico, y ta algo cu mester atende, pasobra cada dia cu pasa e diabel ta cohe bentaha den nan curason, uno e ta yena cu duele pasobra su ruman no ta papia cune, y e otro e ta yena cu rabia riba su ruman.
Ora un pareha no ta papia cu otro den cas, e Spirito Santo di Dios, ta hala un banda, pa wak ken ta confesa y ken ta pordona, pasobra hende rabia cu otro , ta haci nan oracion dificil pa drenta dilanti di Dios. Pasobra e Palabra e palabra di Dios ta bisa: No laga solo baha riba boso rabia,No haci e Spirito di Dios tristo ( Efesionan 4:25 y 30).
Santiago 5:16 ta para scirbi: Pesey confesa boso picanan un na otro, y haci oracion un pa otro, pa boso wordo cura. E oracion efectivo di un hende husto por hopi.
Nos ta hustifica ora nos entrega nos bida na Cristo Hesus, pasobra Cristo Hesus ta nos hustificacion, pasobra e a entrega su bida pa nos na Golgota ( Calvario), pasobra nos mes no por a hacie.
Palabra di Dios ta bisa den 1 Juan 1:9: Si nos confesa nos picanan. E ta fiel y husto pa pordona nos, nos picanan y pa limpia nos di tur inhusticia.
Bendiciona ta esun cu por confesa su pica, y keda na pas cu Dios, y su prohimo.
Sinceramente, Pastor Marcel Balootje
