Ora David tabata bay bringa contra Goliat , tabatin opinion, cu a sali di David su propio ruman grandi , y tambe di Rey Saul, pero David su confiansa den Dios a determina cu e lo ta e vencedor.
Awendia tin hopi hende kier ta consehero, pero ta existi e posibilidad peligroso ora un hende ta conseha bo , y e mes ta desea pa cos no bay bo bon.
Pasobra egoismo ta pone ciego mira, y jaloersheid ta severo, e ora ey bo no ta bay keda cla pasobra malisia a drenta.
Y diabel gusta drama y fama, e gusta asunto di cambia palabra, y tene hende na linja y si bo no sali for di su gara, bo keda ta biba den duda.
Pesey nos mester deposita nos confiansa den Dios y no den hende.
Temor pa hende ta pone un trampa,ma esun cu confia den Senjor lo ta halsa.( Proverbionan 29:25).
Instrui un mucha den e caminda cu e mester cana,y hasta ora cu e bira bieuw e lo no aparta su mes for di dje.
Nos hubentud ta draai hopi riba opinion di hende, kico hende lo pensa.bisa,of papia, pesey ta nos deber pa haci tur locual ta posibel pa nan confiansa aumenta den Dios.
Pasobra ora un hende su confiansa ta den Dios, e lo declara algo y esey lo sosode ( Job 22;27-28), pasobra e boluntad di Dios ta na prome lugar den su bida, y esey ta tur locual cu e mester.
Un bida constante di oracion, ta aumenta nos confiansa den Dios, algo poderoso, pasobra confiansa den Dios, no por wordo midi , pasobra Dios ta contento ora nos tin confiansa den dj’E, pa asina E ricibi tur Honor y Gloria, y demostra cu e ta Dios.
Pesey su palabra ta bisa cu: Ora bo pasa den candela e vlamnan lo no kima bo. Y ora bo pasa den awa, lo bo no hoga, pasobra Dios mes lo pasa hunto cu bo pasobra bo confiansa ta den Dios.
Y caminda hende tin confiansa den Dios, Dios su presencia tey tur momento, pasobra Dios no ta bandona esnan cu tin confiansa den dj’E. ( Isaias 26:3-4).
Pasobra ta fabor di hende mi ta busca awor,of di Dios? Of ta hende mi ta trata di agrada? Si ainda ta hende mi tabata trata di agrada, lo mi no tabata un sirbido di Cristo.( Galationan 1:10).
Den tur cos nos mester laga boluntad di Dios, y confiansa den Dios determina tur cos , y no haci nada riba nos propio forsa, tur cos cu nos ta bay cuminsa, nos tin cu hinca Dios aden for di prome dia, y no laga ora cos pega e ora ey nos ta bay busca Dios.
E palabra ta ordena nos pa para fuerte bisando: Boso a wordo cumpra pa un prijs , no bira esclavo di hende.
Rumannan, laga cada hende keda dilanti di Dios, den e condicion den cual e a wordo yama.( 1 Corintionan 7:23-24)
Ta dificil pa nos por compronde, con un hende por laga su mes wordo usa pa maldad, pa inmoralidad,sabiendo cu tur cos ta na su desventaha.
Un hoben mester compronde cu esun cu ta ofrece arma y droga, no ta respeta su bida, no tin consenshi, no tin balor di ser humano, no tin cuenta cu su futuro, y mas ainda un persona asina no tin e amor di Dios den su curason.
Huy for di opinion di hende negativo,y deposita bo confiansa completamente den Dios.
No tin nada mas bunita cu confia den Dios.
Sinceramente , Pastor Marcel Balootje
