Den e direccion cu mundo ta bay, cu tur cos ta tambalia , y tur cos ta sacudi, y cu hende no por depende riba nan mes forsa, ni riba placa of propiedad, ta bon pa nos para keto un rato y wak for di unda nos yudansa ta bini.
David a bisa ,lo mi halsa mi wowo na e serunan, for di unda mi yudansa lo bini, mi yudansa ta bini for di Senjor,Kende a traha cielo y tera.
E yudansa di mas grandi di nos bida ta bini di Senjor, ta Senjor ta esun cu ta duna nos bida y rosea.Tur hende sa cu nan tin mester di Senjor.
Pero tin hopi kier hunga rol di oportunista nan kier yudansa, nan kier bendicion, pero nan no ta aprecia e fuente for di unda e ta bini.
Ta mescos cu un hende cu ta pidi un fabor y despues cu e ricibi locual e tabata pidi, e ta sigi cana bay manera nada no a pasa, ni tampoco ta gradici esun cu por a yude.
Nos mester tin un refugio, of un posicion di seguridad cual nos por gara na dje den tur momento.
Y esey ta na Dios Todopoderoso y na Su Yiu unigenito cu E mes a manda pa nos Kende ta Hesus Cristo nos Senjor.
Den Isaias 41:10-11 Senjor ta bisa: No tene miedo, pasobra Mi ta cu bo.
No desmaya pasobra Mi ta bo Dios.
Lo Mi fortalesebo si lo Mi yuda bo.
Si lo mi sostenebo cu mi man drechi di husticia.
Mira tur esnan cu ta rabia cu bo, lo keda brongosa y deshonra.
Esnan cu ta pleita cu bo lo ta manera nada y lo perese.
Isaias 54:17 ta para scirbi: Ningun arma cu wordo forma contra bo, lo no prospera.
Y tur lenga cu lanta contra bo den husgamento lo bo condena.
Esaki ta e herencia, di e sirbidornan di Senjor, y nan hustificacion ta bin for di Mi, Senjor ta declara.
Cristo Hesus ta duna nos e gran seguridad bisando: Ami ta e lus di mundo, esun cu sigi Mi, lo no cana den scuridad,ma lo tin e lus di bida.( Juan 8:12).
Den Juan 14:6 Hesus ta bisa : Ami ta e caminda , e berdad , y e bida,ni un hende no ta bin serca e Tata sino ta pa medio di Mi.
Mateo 11:28 Hesus ta bisa: Bin serca Mi tur cu ta cansa y carga y lo Mi duna boso sosiego.
Tin ta confia den garoshi,y otro den cabay, ma nos ta confia den e nomber di Senjor, nos Dios.
Nan a trompica y cay, ma nos a lanta y keda riba pia.( Salmo 20:7-8).
Esun cu ta biba bao di e proteccion di e haltisimo,lo permanece den e sombra di e Todopoderoso.
Lo mi bisa Senjor,Mi refugio y mi forti , mi Dios den Kende mi ta confia. ( Salmo 91:1-2).
E nomber di Senjor ta un toren fuerte, e husto ta core drenta den dje y ta sigur. ( Salmo 18:10).
Nada traha cu man di hende, no por brinda nos e seguridad cu nos mester tin, pesey e palabra di Dios ta bisa den Efesionan 2:8-9: Pasobra pa medio di gracia boso a wordo salba,door di fe,y esey no di boso mes,e ta don di Dios.
Salbacion ta gratis pa tur hende cu ta kere den nos Senjor Cristo Hesus.
E forma cu maldad y inmoralidad ta aumentando riba mundo aki, ta mustra cu nos no por laga nada pa mayan, pero awe mes, entrega bo bida na Cristo Hesus.
Sinceramente, Pastor Marcel Balootje.
