Pasobra Ami ta Senjor bo Dios, Kende ta sostene bo man drechi, Kende ta bisa bo: No tene miedo, lo Mi yuda bo.( Isaias 41:13).
Na pas lo mi bay drumi y pega sonjo,pasobra ta Abo so, O Senjor, ta hacimi biba den seguridad.(Salmo 3:8).
Mi alma ta spera den kietud riba Dios so,pasobra mi speransa ta den dj’E.
E so ta mi baranca y mi salbacion, mi defensa, lo mi no wordo movi.
Riba Dios mi salbacion y mi gloria ta sosega, e baranca di mi fortaleza, mi refugio ta den Dios.
Confia den dj’E na tur tempo O pueblo, drama boso curason Su dilanti, Dios ta un refugio pa nos.
Un biaha Dios a papia dos biaha mi atende esaki, poder ta pertenece na Dios, y misericordia ta di Bo, O Senjor, pasobra bo ta paga cada hende segun su obra.( Salmo 62:5-6-7-8-11-12).
Awendia hopi ta bandona nan confiansa den Dios, y ta pone nan confiansa den hende cu ta temporal. Hopi hende ta pone nan confiansa den material, hopi hende ta pone nan confiansa den ciencia, of sabiduria di otro hende, y hasta hende a yega asina leu cu nan ta ninga Dios y pone nan confiansa den bruheria, den fabula, den cosnan cu nan mes a inventa y asina aleha for di e naturalesa, precioso, perfecto y principionan di Dios cu no ta cambia.
E enemigo ta gara hende cu nan confiansa ta debil den Dios, y ta hiba nan den scuridad, y asina pone nan depende riba cosnan cu nunca por satisface nan bida, y cu semper nan lo biba bao di stress y depresion, pasobra nan no tin pas.
Imagina bo un bida di un hoben mara na droga y alcohol, canando constantemente cu arma,coriendo auto burachi, drumiendo for di cas, bibando un bida di rebeldia, sin un relacion berdadero cu Dios, pensando cu ta via di droga e tin cu bira, aunke e ta mira cuanto hende droga y alcohol a kita nan bida, caunto awe ta invalido, cuanto awe a yega na edad halto, pero te ainda, no a yega na e rikesa cu droga a priminti nan.
Hopi hoben ta bayendo perdi, pa motibo cu nan a pone nan confiansa den hende y no kier pone nan confiansa den Dios.
Un biaha mas nos kier recorda tur hende cu Dios ta Supremo,Dios ta ofrece Seguridad, Salbacion,Bida Eterna,Dios tey tur momento.Dios su Poder ta garantia pa nos den tur cos.
Confiansa den Dios no ta un luho, e ta un gran necesidad, e ta nos forma di biba, ningun hende no por biba independiente di Dios. Tur hende mester di Dios den nan bida, pega na Dios nos por tur cos leu for di dj’E nos no por nada.( Juan 15:5).
Pasobra pa medio di gracia nos ta salba door di fe,y esey no ta di boso mes, e ta e don di Dios, no como rsultado di obranan pa ningun hende no gaba.( Efesionan 2:8-9).
Ma si cualkier di boso falta sabiduria,lage pidi Dios, Kende ta duna na tur hende generosamente y sin reproche, y esaki lo wordo duna na dje.( Santiago 1:5).
Moises a depende di Dios, y Dios a husa Moises grandemente.
Rey Ezequias a depende di Dios, y Dios a salba su pais.
Daniel a depende riba Dios, y boca di leon a wordo sera.
Sadrac , Mesac y Abednego a confia y depende di Dios, y a pasa den forno di candela, sali sin wordo kima.
Cu confiansa den Dios , nos lo vence scuridad, y tur maldad.
Sinceramente, Pastor Marcel Balootje
