Presidente di Merca, Donald Trump, a confirma diahuebs cu e ta di acuerdo pa e seleccion di Iran drenta su pais pa hunga den e Copa Mundial di Futbol. Esaki ta bin a pesar di e tensionnan den Medio Oriente y e guera cu Merca a inicia contra e republica islamico den februari ultimo, un conflicto cu a wordo escala pa e bombardeonan Mericano den regionnan cerca di Irak.
Trump a splica cu el a combersa cu e presidente di FIFA, Gianni Infantino, kende a duna e mandatario libertad total pa dicidi riba e entrada di e hungadonan. “Gianni ta fantastico. E ta un amigo di mi, y nos a papia riba e asunto; el a bisa mi: ‘Haci loke bo kier. Bo por acepta nan. Bo por rechasa nan. Bo no tin nodi di tene nan den e pais'”, Trump a declara durante un acto na Cas Blanco.
FIFA ta confirma participacion
E decision aki ta bin despues cu Infantino mes a confirma den e di 76 Congreso di FIFA na Vancouver cu Iran lo participa den e torneo cu ta cuminsa dia 11 di juni na Merca, Mexico y Canada. Ora Trump a wordo informa di e anuncio aki, el a reacciona bisando: “Bueno, si Gianni a dicidi e ora ey, mi ta haya cu ta bon.”
Danki na e clasificacion di Iran, e ekipo lo mester hunga den Grupo G na Los Angeles y Seattle. Sinembargo, e situacion ta keda tenso debi na e confrontacion militar entre Merca, Israel y Iran. Hopi analista ta observa cu cautela con e guera aki, cu a afecta grandemente e region rond di Irak, por influencia e siguridad di e evento.
Problemanan di visa y inmigracion
Apesar di e “luz berde” di Trump, e federacion di Iran no tabata presente na e congreso na Canada. Segun e agencia Tasnim, e delegacion mester a bolbe nan pais despues di un “comportacion inapropia” di e funcionarionan di inmigracion na aeropuerto di Toronto.
Pa loke ta trata e siguridad nacional di Merca, Secretario di Estado Marco Rubio a indica cu lo autorisa entrada di e hungadonan, pero lo nenga acceso na cualkier personal tecnico cu Washington ta asocia cu e Guardia Revolucionario. Mientrastanto, Trump a cera su comentario cu un tono di broma riba e nivel di e ekipo di Iran: “Probablemente nan tin un bon ekipo. Nan tin e? Boso sa si nan tin e? Mi no tin ni idea. De hecho, lo ta dificil pa kere.”
