Recientemente AZV a implementa varios cambio den su polisa tocante cobertura di cierto remedio. Segun un anuncio di BENU Pharmacy, remedi manera pilder pa drumi y ansiedad no ta wordo cubri mas bao di e mesun criterio desde 1 di juni 2025.
Aunke AZV a opta pa sigui cubri e remedio aki temporalmente te cu 30 di september 2025, e situacion por cambia den oktober.
E cambio aki ta crea hopi confusion y stres tanto pa aseguradonan cu ta depende di e medicamentonan aki, como pa boticario y dokter cu ta atende nan.
Un pregunta importante ta kico AZV lo haci despues di 30 di september 2025. Si cobertura ta stop, hopi hende cu ta depende di remedi pa drumi of ansiedad lo keda sin tratamento, algo cu por afecta nan salud mental y bienestar general.
Ta fundamental pa AZV y Minister di Salud Mervin Wyatt Ras duna mas claridad y transparencia riba esaki, pa evita incertidumbre y pa yuda tanto clientenan como proveedoran prepara pa cambio futuro. Sin plan di transicion y sin claridad, e consecuencia social y medico lo ta grave, y lo pone hopi hende den un situacion di vulnerabilidad mas grandi.
Pa awor mester keda den incertidumbre y confusion kico lo pasa dia 1 di october 2025.
