Siman pasa Minister Mr. Geoffrey Wever, di Asuntonan Economico, Comunicacion y Desaroyo Sostenibel, a reuni cu directora di Biblioteca Nacional, señora Astrid Britten y funcionario di Biblioteca Nacional sr. Ronny Alders, den preparacion pa un congreso cu Biblioteca Nacional lo organisa na April 2022, cu e topico “Economia Circular”.
Biblioteca Nacional tur aña ta organisa un congreso “Sustainable Education Symposium” y e aña aki a scohe e topico “Economia Circular” y den e cuadro ey a pidi Minister Wever como minister encarga cu ambos economia y desaroyo sostenibel pa ta un orador durante e congreso aki.
“E ta un honor di por forma parti di e congreso aki como orador, e topico di “Economia Circular” ta forma parti integral di nos maneho pa e proximo 4 ananan”, segun Minister Wever. “Mi ta hopi contento pa wak con Biblioteca Nacional ta carga e topico di sustainability y mi ta honra pa por duna mi contribucion”.
Economia Circular ta un modelo economico unda material prima, componente- y productonan ta perde nan balor menos posibel door di wordo reapropia of ta wordo reuza den e proceso di produccion.
Mirando cu Aruba ta un pais cu te ainda ta importa casi tur cos y cu Aruba tin su retonan pa tratamento di desperdicio, nos mester haci un transicion structural den nos sociedad, caminda por ehempel ta modifica e manera con nos ta construi, pa haci esaki na un forma mas duradero, pues usa tecnologianan y materialnan di construccion cu ta produci menos “waste” posibel y caminda materialnan por wordo reintegra of reuza den futuro. “Nos ambicion ta pa haci un transicion como pais riba e tereno aki”, segun Minister Wever.
