Pa prome biaha den su historia, Banco Central di Aruba (BCA) ta habri su portanan pa comunidad pa un evento historico: ‘CONOCE BOBANCO CENTRAL ’. E actividad lo tuma luga diasabra 22 di november 2025 y lo brinda un experiencia educativo y interactivo unda grandi y chikito por descubri e rol esencial cu BCA tin den nos economia y comunidad.
E actividad aki ta e prome biaha cu BCA ta habri su portanan pa pueblo di Aruba pa asina ofrece e oportunidad di conoce mihor e mision, balor y e rol como Banco Central. Den cuadro di e proceso di actualisacion di nos identidad visual, BCA no solamente ta refleha un imagen nobo, pero ta enfoca riba educacion y aumenta conscientisacion tocante e responsabilidadnan cu e institucion ta carga.
Durante e actividadnan lo ofrece un oportunidad unico pa grandi y chikito pa explora e diferente areanan di trabou di BCA. Durante dia bishitantenan lo por entre otro siña con BCA ta mantene e balor di nos florin, ta cuida stabilidad financiero, ta controla inflacion y hopi mas. Expertonan local y internacional di BCA lo ta disponibel pa duna educacion financiero, splica mas encuanto Cyber Security. Tambe lo por presencia un Hackaton cu lo tuma luga na BCA. Lo tin exposicion di Aruba su moneda, e Florin den e stacion di ‘Nos Tesoro – Aruba su Florin’ y tambe lo tin tayernan pa henter famia por participa. Pa esnan di mas chikito lo tin un kidscorner cu wega y puzzel educativo.
BCA kier enfatisa cu e actividad aki ta un oportunidad pa comunidad conoce no solamente e trabou di BCA pero conoce tambe e team dinamico tras di un institucion asina importante pa Aruba.
BCA ta haci un invitacion cordial na comunidad completo pa bishita e ‘CONOCE BOBANCO CENTRAL ’ y tuma parti den e experiencia educativo y interactivo riba 22 di november. E dia ta cuminsa for di 10 ‘or di mainta te cu 6 ‘or di atardi. Cantina lo ta bon surti. Bishita e pagina di Facebook di Banco Central di Aruba pa keda na altura di tur informacion.‘CONOCE BOBANCO CENTRAL ’ lo ta un dia yena di conocimento, descrubimento, inspiracion y un muestra di BCA su compromiso pa integridad, sostenibilidad y responsabilidad pa comunidad.
