E Caso Avestruz, den cual ex minister Benny Sievinger tin un condena di 4 anja, no ta solamente un caso legal di corrupcion. E ta parti di nos historia di consecuencianan real cu nos comunidad ta sinti te awe: falta di tereno pa nos hobennan por construi nan propio cas.
Kiko ta e esencia di e caso?
Durante añanan, terenonan di gobierno cu mester a sirbi pa desaroyo di comunidad, a wordo entrega indebidamente a cambio di fabor politico y beneficio personal. Un solo persona a haya 90 mil meter cuadra di e ex minister Benny Sievinger, y a cambio a duna otro fabornan politico.
Un otro persona, cu e ex minister a declara cu ta su amigo, a haya miles di meter cuadra di tereno, y a cambio a regala e ex minister un gym nobo nobo na su cas, y a construi un cura p’e. Cu e tereno ey e persona a gana miyones di florin, y autoridadnan a logra confisca ainda un cuenta bancario di dj’e na Curacao cu 1 miyon riba dje.
Un otro compania a haya tereno y privilegionan pa construi mas kamber di hotel, y a cambio, nan a cubri gastonan di fiesta pa e yui muher di e ex minister, Stephanie Sievinger. Huez a constata den e veredicto tambe cu e estudio di su yiu muher, Stephanie Sievinger, a wordo paga cu placa cu e minister a gana, speculando cu tereno di gobierno.
Dicon e caso a ta perhudica abo awe ainda?
Segun informacion cu a sali na cla den proceso hudicial y reportahenan di medio di comunicacion cu ta publico pa tur hende, e corupcion aki a contribui na un escases serio di tereno disponibel pa ciudadanonan por traha nan cas. Pa hopi famia Arubiano, e consecuencianan ta doloroso y directo. Hobennan no por haya un pida tereno pa cuminsa nan bida independiente. Parehanan hoben ta keda dependiente di nan mayornan pa hopi mas tempo. E sonjo di tin un cas propio ta bai cada bes mas leu.
E realidad aki ta mustra cu corupcion no ta un concepto leu di bo. E tin impacto directo riba calidad di bida di hende comun. Cada pida tereno cu a wordo usa pa interes particular di e ex minister Benny Sievinger pa privilegia su amigonan, ta un oportunidad perdi pa un famia, pa un hoben, pa futuro di nos isla.
Segun cifra y analisis presenta den diferente informe publico y veredictonan di Corte, e necesidad pa tereno di vivienda ta aumenta mucho mas cu e poco oferta disponibel. E desbalance aki ta wordo enpeora door maneho incorrecto den pasado di ex miniser Benny Sievinger. Ademas, e desbalance aki ta haci cu tur tereno y cas cu tin disponibel awor, ta na prijsnan inpagabel.
E veredicto di e Hoge Raad e siman aki, lo no duna nos e terenonan bek, lamentablemente. Pero e ta importante pa hobennan cu no por haya tereno ni cas, por lo menos compronde e motibo dicon. Y pa nos como comunidad percura pa nunca mas tipo di corucpion asina tuma luga mas
Nos hobennan merece un oportunidad real pa traha y construi nan futuro na Aruba. Esaki ta un derecho, no un privilegio.
