Tur hende por construi un cas, sea di palo , blokki, of ta cumpra un cas, no ta importa e grandura sea e tin uno, dos, tres camber of cinco camber, pero su construccion mester ta fuerte pa e por ta un cas duradero.
Pero ora nos ta papia di un hogar, nos ta papiando di algo mas excelente, caminda amor y pas ta reina, caminda tin respet, etica y un moralidad hopi halto, caminda Cristo Hesus ta na prome lugar.
Bijbel ta siña nos pa traha nos cas riba e Baranca cu ta Cristo Hesus, y ora mal tempo y tempestad presenta nos ta sigur pasobra nos cas ta riba e baranca cu ta Cristo, aki nan nos ta papia di tanto nos cas fisico , como nos bida spiritual.
Kico ta pasando awendia? Hende den nan afan pa competencia y grandesa, orguyo, y falta di temor di Dios, no ta worry cu e presencia di Dios den nan cas , pero ta e presencia di Dios den un cas ta cambia e edificio hacie un hogar.
Placa no por cambia un cas den un hogar, pasobra placa no tin poder pa transforma mente y curason di hende. Placa no ta amor, y amor no ta Placa. Tin hende tin hopi placa, pero ta hopi pober, pasobra nan no tin amor y caminda no tin amor di Dios no tin nada.
Cu sabiduria un cas ta wordo traha, y cu comprendemento e ta wordo estableci.( Proverbionan 24:3).
Nos mester busca sabiduria di Dios, awor mas cu nunca pa dirigi nos famia, pasobra e tempo den cual nos ta bibando ta trabahoso, y enemigo ta haci tur locual ta posibel pa trece mal comprendemento, rebeldia y division den un hogar.
Pesey Oracion ta necesario, Ayuno ta necesario,Alabansa ta necesario, Conocemento di e palabra di Dios ta necesario , pa asina henter e famia por para firme contra e plannan di e enemigo.
Union den famia ta sumamente necesario, ningun hende por wordo laga afo, mester pone atencion un pa otro, mester pordona y stima otro y den tur caso, y mas cu tur cos encurasha otro pasobra e dianan ta dificil.
Nos tur mester permiti Señor establece nos cas, tanto spiritual como fisico, nos mester pone nos cas na ordo, sacando tur locual no ta di Señor for di nos bida, y biba den boluntad di Dios.
Nos bida mester ta un bida cu ta agrada Dios, nos no por biba den pleito, faltamento di respet, palabra malo na cantidad, violencia domestico y kere cu nos bida ta agrada Dios.
Cuminsa saca bruheria y idolatria for di nos cas, pasobra esey ta cos abominabel y prohibi pa Dios, for di cuminsamento di mundo.
Ban deshaci di e uso di droga y alcohol, kibra cu adulterio y fornicacion, pasobra e boluntad di Dios pa nos bida ta nos : Santificacion , esta pa nos abstene di tur clase di inmoralidad sexual, pa cada uno di nos sabi con pa tene nos curpa den santificacion y honor. ( 1 Thesalonisensenan 4:3).
Ma busca prome e reino di Dios y Su husticia prome y tur e cosnan aki lo wordo añadi na boso,
Ora nos hogar ta yena cu e presencia di e Haltisimo, nos pensamento lo cambia, pasobra caminda tin presencia di Dios ta no tin lugar pa falsedad, mentira, dobbel animo, pero e seguridad cu Cristo Hesus ta ofrece ta nos lus di cada dia, y nos confiansa lo aumenta, y nos bida lo ta un testimonio cu otronan por mira y asina gradici Dios tur momento.
Sinceramente , Pastor Marcel Balootje
