Riba 13 di mei ultimo, College Aruba financieel toezicht (Caft) a dirigi un carta na Minister di Finansa y Economia compartiendo nan conseho rib’e prome concepto di adaptacion di presupuesto 2025. Rib’e prome pagina di nan conseho, Caft a adverti pa tene cuenta cu un posibel debilitacion den turismo p’e di dos mita di aña 2025. Esaki debi na desaroyo geo-politico cu ta tumando luga actualmente.
Minister di Turismo, Transporte y Labor, mr. Wendrick Cicilia a comenta riba e punto aki durante un conferencia di prensa di gobierno recientemente. E mandatario di turismo a confirma cu tanto su ministerio como Aruba Tourism Authority (ATA) ta opina diferente.
E no ta un secreto cu e mercado di Noord Amerika ta keda esun mas importante pa nos dushi Aruba. Pero berdad, mester ta consciente di e desaroyo mundialmente. Pa cu esaki, hunto cu oficina di turismo, a compila un documento titula: Nabega e efectonan di e administracion di Trump.
ATA a institui e proceso pa monitor e impacto y desaroyo na Merca. No ta esey so, hunto cu e desaroyo politico na Merca, tin un tension internacional tambe cu nos tin cu tene cuenta cu ne. Hunto cu demas departamento di gobierno, ta siguiendo esaki di cerca.
E bon noticia: ATA ta confirma cu nos turismo ta stabiel! No obstante e tension geo-politico, esaki no lo afecta e desaroyo turistico na Aruba. Ya a studia e proyeccion pa aña 2025 y ta raporta un crecemento minimo di 5% pa cu ‘stay over visitors’. Tur cos ta indica cu Aruba ta ‘performing’ mucho mas miho di locual a pronostica pa aña 2025. Compara cu region, Aruba ta keda esun sobresaliente y ta continua di ‘perform’ FUERTE!
“Ban sigui demostra nos miho cara na nos turistanan. Como Minister di Turismo, Transporte y Labor e ta yena mi orguyo ora mi mira cu nos trahadonan ta sigui carga e sector di turismo cu hopi pasion. Aruba ta orguyoso di Boso”, asina Minister Cicilia a termina bisando.
