Den un capitulo nobo di controversia, secretario di estado Van Huffelen a bolbe divulga informacion robes. E biaha aki, su afirmacion cu Hulanda no a establece condicionnan pa Aruba relaciona cu e modificacion di e ley di LAFT a wordo contundentemente desmenti, poniendo preguntanan riba e corectitud di su declaracionnan haci den medionan local.
Apesar di a descarta e posibilidad di problema di memoria di Van Huffelen, e persistencia den divulgacion di informacion incorecto ta sugeri un posibel motivacion politico. E ultimo atake ta enfoca directamente pa desacredita e prome minister di Aruba, Sra. Wever Croes, agregando atrobe discordia innecesario na e relacion bilateral ya delicado.
E calidad di e politiconan hulandes tambe ta den duda, ya cu e insidente aki ta agrega na un cantidad di controversia di pasado. For di negosacion riba RAFT unda Aruba a entrega 11 oferta te cu eror den e fecha di “deadline”. E tendencia pa genera confusion ta parse di ta continuo den e strategia di comunicacion di Van Huffelen y algun otro.
Nos no por lubida e mas reciente calumnianan di Van Huffelen, esta e afirmacionnan falso cu Aruba no a presenta ningun oferta pa Raft y e confusion rond di un “deadline” di 1 y 30 di september pa acceptacion di Raft, ta yama pa un comunicacion mas sincero y transparente diparti Hulanda.
Den medio di e controversia nobo aki, ta spera cu e promer minister di Aruba, Sra. Wever Croes sali desmenti un biaha mas e condicionnan adicional impone dor di Hulanda, (3 puntonan) demostrando e firmeza di su posicion y eliminando e dudanan sembra pa e declaracionnan controversial y mediocre di Van Huffelen na un medio local.
E polemica nobo aki ta loke ta trece consecuencianan significativo pa e relacion entre Hulanda y Aruba, manera nos a constata caba cu Minister Xiomara Maduro a trece dilanti recientemente na Den Haag, y ta subraya e importancia di un comunicacion cuidadoso y corecto.
