Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua diadomingo ultimo riba veld di Kudawecha. Calabas Blue Jays a traha duro y ta bons bek den di 6 inning pa logra derota Stingers 13-7 y asina garantisa nan posicion number 2 den Pool A y ta clasifica pa e siguiente buelta.
Stingers un ekipo nobo den Copa Noord a duna un tremendo performance anotando 5 careda den promer inning pa pone presion riba Calabas Blue Jays. Calabas ta responde cu 1 careda den bom di promer inning. Stingers ta amlia cu 1 careda den cabez di 3 inning mientras Calabas Blue Jays ta anota 2 careda den bom di 3 inning pa mantene e wega serca perdiendo 6-3 te na e momentonan ey. Den bom di 6 inning Calabas Blue Jays ta usa su experencia y coy un inning grandi anotando 9 careda pa hasi e score 13-6 na nan fabor. Stingers den cabez di 7 inning a keda menasa y no kier a entrega y ta score un careda pa asina e wega termina 13-7 pa Calabas Blue Jays. Score final Calabas Blue Jays 13 careda, 14 hit, 3 error y ta laga 6 coredor na base. Stingers 7 careda, 9 hit, 1 error y ta laga 5 coredor den circulacion. Mihor bateadornan pa Calabas Blue Jays a resulta Eugene Helder 2-2, Joshua Ramada y Gerald Tromp di 3-2 y Roberto Vargas a bay di 1-1. Pa Stingers a luci cu e bate den man Trevor Geerman, Pedro Mauricia ambos di 3-2, Alexander Groeneveld di 2-1 y Lucas Henriquez a bay di 3-1. Rodney Kelly ta bay e ruta completo pa seya di dos victoria riba su nomber den Copa Noord 2025. Lucas Henriquez ta resulta pitcher perdedor.
Diasabra awor 14 di Juni pa 7 pm Calabas Blue Jays lo mira accion contra Kudawecha Indias na veld di Kudawecha. Copa Noord 2025 ta den su recta final diasabra cu 3 wega di cruse, 5pm,7pm, y 9pm. Pues un pa tera y un pa lama unda e ganadornan solamente lo sigui pa diadomingo mas (1) mihor perdedor.
Diadomingo awor 15 di Juni dia di Tata lo tin e gran final cu Tsunami!
Diadomingo 15 di juni “Tatanan” lo celebra na veld di Kudawecha. Desde 10 or di mainta lo tin wega y ambiente mientras e dos semi finalnan lo wordo hunga 12pm y 2 pm. Pa 4pm di atardi e ganadornan lo topa otro den e “Gran Final di Copa Noord 2025” pa despues celebra cu Tsunami te 10 or di anochi. No laga nan conta Bo. Copa Noord 2025 hunto cu HEINEKEN diadomingo awor den su recta final!
