Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua cu varios wega fin di siman na veld di Kudawecha. Diadomingo merdia den pool A e dos ekiponan invicto, te na e momento ey, a topa otro. SV Royal Power campeon di Copa Noord 2018 a topa Calabas Blue Jays campeon di Copa Noord 2019 den un tremendo partido pa define kende lo bay ta na prome luga pa comanda pool A. Den promer inning Royal Power ta rally pa bay ariba 3-0. Royal Power ta amplia cu 2 careda mas den 2 y 4 inning pa hasi e wega 5-0. Calabas Blue Jays no ta baha cabes y den bom di 5 inning ta rally pa empata e wega 5-5. Kelvin Silvania ta drenta den di 6 inning como “pinch hitter” y ta conecta un doblete den deep left center pa empuha e careda di bay ariba 6-5 mientras Keith Hooker tambe ta anota den cabez di 7 inning riba un hit coriendo “bulando” di primera te home pa hasi e wega 7-5. Calabas Blue Jays no ta entrega y ta menasa den bom di 7 inning cu 2 coredor den “scoring position” cu dos out pero riba un hungada sensacional di Gillian Wernet na tercera base ta fucila Randy Paredes na primera pa termina e partido. Royal Power su batenan tabata na candela. Royal Power Tat Fat 7 careda, 16 hit, 1 error y ta laga 12 coredor na base. Calabas Blue Jays 5 careda, 9 hit, 1 error lagando 5 coredor na base. Mihor bateadornan pa Royal Power a resulta Gillian Wernet 5-4, Giandrick Lacle y Kenny Hart ambos di 4-2, Kelvin Silvania di 1-1. Pa Calabas Blue Jays a luci na plato Randy Paredes di 4-3, Joshua Ramada y Marvin Brown di 4-2. Jomark Flanegin ta bay 7 inning completo pa seya e victoria riba su nomber. Roberto Vargas kende ta drenta releva Jomir Vrolijk den di 5 inning ta resulta e pitcher perdedor. Asina Royal Power ta pasa pa lidera pool A. Diasabra awor 31 di Mei cuminsando di 5pm Copa Noord ta continua cu 3 wega amistoso 5pm-7pm y 9pm.
Diadomingo 1 di Juni ta 100% pa Mary Joan Foundation Diadomingo 1 di Juni SV Royal Power ta duna bek pa un bon causa. Lo organisa 5 wega amistoso mientras Mary Joan Foundation lo tin e Bar y Cushina 100% pa nan recauda fondo. Lo hunga henter dia cu un bala di softball color “roos” pa e awareness di cancer y e wega final atardi lo ta entre Spash vs Blackout Girls. Desde 6 pm e banda Phenomenon lo tey pa pone ambiente. Henter pueblo di Aruba ta keda cordialmente invita pa pasa mira wega na veld di Kudawecha y duna bo contribucion na Mary Joan Foundation cual sigur ta pa un bon causa.
