Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua cu varios weekend tras di lomba na veld di Kudawecha. Diadomingo ultimo un otro historia a wordo skirbi. Riba e dia aki Super Plus ta gana Kudawecha Redskins 9-8 momento cu trabuco di antaño Johannes Poy Flanegin, na kende Copa Noord 2025 ta wordo dedica, a pitcha pa Super Plus contra Kudawecha Redskins cubriendo henter e ruta y ta sali pither ganador. E mesun dia y porcierto e siguiente wega e jui homber di Poy esta Jomark Flanegin ta pitcha pa Royal Power contra Calabas Blue Jays. Jomark Flanegin tambe ta cubri ful e ruta y ta sali pitcher ganador ganando su wega 7-5.Tata y Jui ta resulta pitcher ganador den Copa Noord riba mesun dia Nos a buska pa sa mas di historia di Copa Noord y ta complilando hunto cu un comision hopi data pa asina skirbi e historia di e bunita torneo Copa Noord cual tin alrededor di 46 aña di existencia. Tur cos ta mustra cu nunca antes un tata y jui pitchando pa dos diferente team a logra sali pitcher ganador den weganan di Copa Noord y sigur no riba e mesun dia. Johannes Poy Flanegin y Jomark Flanegin a logra e hasaña aki 25 di mei 2025 riba veld di Kudawecha. Esaki sigur lo forma parti di e bunita historia. Pabien na Tata y Jui esta Poy y Jomark Flanegin cu e bunita logro aki. Diasabra awor 31 di Mei cuminsando di 5pm Copa Noord ta continua cu 3 wega amistoso 5pm-7pm y 9pm. Diadomingo 1 di Juni ta 100% pa Mary Joan Foundation Diadomingo 1 di Juni SV Royal Power ta duna bek pa un bon causa. Lo organisa 5 wega amistoso mientras Mary Joan Foundation lo tin e Bar y Cushina 100% pa nan recauda fondo. Lo hunga henter dia cu un bala di softball color “roos” pa e awareness di cancer y e wega final atardi lo ta entre Spash vs Blackout Girls. Desde 6 pm e banda Phenomenon lo tey pa pone ambiente. Henter pueblo di Aruba ta keda cordialmente invita pa pasa mira wega na veld di Kudawecha y duna bo contribucion na Mary Joan Foundation cual sigur ta pa un bon causa.
