Copa Noord 2025 organisa pa Sv Royal Power Tat Fat patronisa pa Heineken ta wordo dedica na 4 baluarte. Francis Arcaya, Johannes Poy Flanegin, Alvaro Barrios y Samuel Nel Frank. Apertura official lo ta diabierna 16 di mei cuminsando pa 7pm riba veld di Kudawecha.
Historia cortico di Francis Arcaya
Francis.M.A.Arcaya a nase 18 April 1972. Francis a lanta den Vecendario di Noord y a bai onderbouw Colegio Ora Ubao a sigui pa Juliana School, Maria College y Avond Mavo. Francis Arcaya tin Militaire Achtergrond a traha na Land Aruba y actualmente ta trahando na Fatamorgana. Francis Arcaya ta tata di 2 jui homber Francil y Jeandrick Arcaya kendenan tambe a lanta ta hunga baseball Little League den CBN. Francis Arcaya a lanta bou di famianan cu hopi amor pa deporte y comotal e tambe a siña practica varios deporte desde hoben. Francis a cuminsa train di mucha cu e ekipo di softball di su Tio Juancho Arcaya (Qepd), Bronx Bird Amstel Beer. Alabes Francis a cuminsa train voetbal cu su tata Mario Maduro cu e ekipo di Riverplate. Francis a hunga baseball tambe y a reforsa Team Concord contra Republica Dominicana y Venezuela. Francis a hunga futbol cu Jong Aruba. Francis tabata practica e deporte di coremento y tambe tabata landa. Tempo di scol bou coach Gino Wauben y Jacky van Putten Francis Arcaya a practica Atletiek na Sport Center Noord. Francis Arcaya a hunga fast pitch tambe cu varios ekipo entreotro Amstel Beer, Seagrams Tigers. A melita den ekiponan manera Salbabo, La Rocca, Pro Juventud y Dolce Vita Restaurant. A hunga Copa Gubernamental y den varios otro torneo. Na final di anja 80 y inicio di anja 90 Francis Arcaya a melita den e equipo di Calabas Blue Jays unda a yega di hunga contra varios ekiponan di Corsou entreotro Catapilar. Desde 1991 Francis Arcaya a drenta e famia grandi di Montaña Braves na unda el a keda hunga te aña 2014. Momento el a sufri un leccion e mester a retira. Den Copa Noord cu Montaña Braves Francis a logra varios titulo di campeon. Francis por cora na 1997 nan a derota Calabas pa titula campeon y na 1998 a ripiti esaki derotando Tanki Flip den final. Na aña 1999 y 2000 Francis Arcaya cu Montaña Braves a bolbe hunga final di Copa Noord y ta bira sub campeon den ambos ocasion. Na aña 2009 Montaña Braves ta derota Royal Power 6-5 den final di Copa Noord pa titula campeon mientras na aña 2010 Montaña Braves ta bolbe yega final contra Royal Power y ta cay venci.Asina por bisa cu Francis Arcaya tin un trayectoria largo den deporte y sigur a brinda su contribucion den Copa Noord pa varios aña hungando den varios final. Francis Arcaya tin varios titulo di campeon y sub campeon den Copa Noord cu su ekipo Montaña Braves. Merecidamente SV Royal Power ta dedica Copa Noord 2025 na su honor. Masha Masha pabien y danki pa bo aporte na deporte.
