Diaranzon merdia, Hof di Corte Superior, a dicta sentencia den e apelacion di e homber D.F., contra su castigo di 9 aña di prison.
SOLO DI PUEBLO por a compronde cu Hof ta haya e castigo mucho halto y a baha esaki di 9 pa 5 aña di prison.
Dia 20 September 2024, D.F. a wordo condena na 9 aña di prison pa intento di mata riba 21 Januari 2024.
D.F. ta un cantante rapper bibando na Hulanda. E tempo ey, el a bin Aruba pa canta. Dia 21 Januari 2024 den oranan di anochi tabatin un tiramento dilanti e parkinglot di Molen. Via camera di seguridad a mira D.F. ta haci movecionnan sospechoso y hasta ta mira vlam di candela ora cu a haci tironan riba un Nissan March. Den e March tabata e hombernan V.E. y M.E., kendenan a sufri rasca di bala.
BAHA CASTIGO DI 9 PA 5 AÑA
D.F. no tabata di acuerdo y a apela. D.F. ta para riba cu ningun momento el a tira.
E sentencia tabata via video conference. E miembronan di Hof tabata sinta den un sala di Corte na Curacao y via un pantaya grandi poni mey mey dilanti den sala di Corte, por mira e miembronan di Hof y e miembronan di Hof ta mira e acusado y tur presente den sala di Corte. Hof a bisa cu e ta haya legalmente proba cu D.F. ta culpabel di intento di mata riba 21 Januari 2024. Hof ta haya cu D.F. a tira riba un auto den cual tabata e hombernan V.E. y M.E. E balanan a dal den e auto, kibra windshield y rasca e dos personanan.
Hof a bisa cu mescos cu Hues di Corte den Promer Instancia, no ta kere den declaracion di D.F. cu tin un set up pa e ta sera den prison. Na opinion di Hof, e imagennan di video ta mustra otro cu loke D.F. ta declara.
Hof a conclui cu D.F. a los diferente tiro riba e auto March. Bala a dal den e auto y un otro auto.
Pa cu e castigo, Hof a bisa cu ta tene cuenta cu ta na un lugar publico a tira y otro hendenan por a resulta herida. Hof a tene cuenta cu orientacion di sentencianan di casonan di tiramento di Corte Superior y ta haya cu e castigo ta mucho halto. Hof a baha e castigo di 9 pa 5 aña di prison.
