Diaranson mainta Hof di Corte Superior a trata e apelacion di e dama C. (22), contra su sentencia di 2 aña di prison.
SOLO DI PUEBLO por a compronde cu e acusado C. ta insisti cu e ta inocente y cu inhustamente e ta sintando castigo den KIA. Procurador General (PG) a insisti pa Hof mantene e castigo di 2 aña di prison.
Den sala di Corte tabata presente e mama di e dama R., kende a presenta cu e demanda di daño contra C. PG a acusa C. cu riba 19 Maart 2024, hunto cu e homber V., a forza e dama R. pa haci relacion sexual cu e homber V. PG ta considera esaki violacion y tambe actonan inmoral. PG a bisa cu e dama R. tabata den situacion for di tino y no por a dicidi kico tabata pasa cun’e.
VIOLA DAMA
Hof a mustra cu Corte den Promer Instancia a condena C. pa violacion y a declara C. liber di a haci actonan inmoral cu R. cu tabata for di tino. Hof kier sa pakico C. a apela e sentencia. Segun C. e no ta di acuerdo cu e castigo pasobra e no a haci nada.
Hof a bisa cu ta trata e caso riba e acusacion violacion. E presidente di Hof a bisa cu e escencia di violacion ta obliga un persona haci algo cu e no kier. Hof a mustra cu e homber V. a penetra e dama R., cu ta un amiga di C., sin cu R. tabata kier. E dama R. a declara na Polis cu nan a force, nan a kita su paña.
Segun C., no tabatin violacion. El a bisa Hof cu tabatin relacion sexual normal y ningun momento R. a bisa pa stop. Hof a remarca cu R. a grita pa stop y cu e tin dolor. Segun C. ora cu R. a bisa pa stop, nan a stop. El a bisa cu e no a mira R. reacciona manera cu algo malo a pasa y R. no a reclama cu nan a haci malo cun’e. Segun C., R. a yama su amigo pa bay busk’e y R. a bay pafor di e apartamento.
VICTIMA DI VIOLACION HAYA TA YORA
Hof a mustra cu un agente di Polis a pasa den su auto y a mira R. sinta riba acera ta yora. C. a remarca na Hof, pakico Polis no a bay na e apartamento y puntra kico tabata pasando. Hof a bisa cu R. a whatsapp un amiga A. E amiga A. a declara na Polis cu R. tabata yora y R. a bisa cu nan tabata force y cu nan tabata haci’e dolor.
Hof a remarca cu ademas cu Polis a haya R. tabata yora, a haya tur e combersacionnan riba su whatsapp. E anochi mes a haci investigacion riba R. na hospital y a manda muestra DNA Hulanda caminda Instituto Forence di Hulanda (NFI), a haya indicacion cu R. lo por a wordo penetra. Hof a sigui bisa cu e homber V. a bisa cu e no a penetra R. El a bisa cu ora el a bay tene relacion sexual cu R., R. a bisa stop y el a stop.
Hof a papia cu mama di R. Hof a bisa cu un parti di demanda a keda aproba den Corte den Promer Instancia. Hof a puntra e mama, con ta bayendo cu R. E mama a splica cu su yiu ta den un proceso. Tin dia e ta bon y tin dia e ta menos bon. Hof a bisa cu mas o menos 8 mil florin di daño material y 10 mil florin di daño inmaterial e mama a haci demanda. Ta asina cu Corte den Promer Instancia a aproba 5 mil florin na daño inmaterial. E mama a bisa cu e ta mantene e demanda.
PG A EXIGI PA MANTENE E 2 AÑA DI PRISON
PG a bisa Hof cu 19 Maart 2024 den oranan di marduga, un Polis cu pa casualidad a pasa riba e caminda den su auto, a mira R. sinta riba acera y tabata yora. El a bay atende R. y a haya sa cu C. a force tene relacion sexual cu e homber V. E mesun dia R. a haci denuncia. Na November 2024, C. y V. a wordo deteni relaciona cu e denuncia. C. a wordo condena na 2 aña di prison y e mesun dia el a apela. PG a bisa Hof cu por a scucha C. bisa cu e no a haci nada. Na opinion di PG, Hues di Corte den Promer Instancia ta haya cu tin suficiente prueba y a condena C. pa violacion. Instituto Forence di Hulanda, NFI, ta mustra cu a haya DNA den parti intimo di R. y esaki ta mas di V. Ta asina cu V. ta keda para riba cu e no a penetra R. PG a bisa cu e declaracion di C. y V. no ta consistente y pesey no ta confiabel. PG. ta haya e declaracion di e victima R. ta confiabel y tin pruebanan di sosten. El a pidi Hof pa confirma e sentencia di 2 aña di prison.
ABOGADO
Mr. Emerencia a cuestiona e hecho cu a dura 8 luna promer cu Polis a bay over na detene C. y V. Esaki a causa cu videonan y potretnan cu C. a saca di loke a sosode e anochi ey, a disparce. E abogado ta haya cu esakinan lo por trece claridad kico tur a sosode. Na opinion di abogado, tambe lo por a busca imagennan di videonan di seguridad na e lugarnan cu nan a bishita. E abogado ta haya cu esaki ta un fayo di parti di Ministerio Publico di a tarda. Esaki ta afecta tur e defensa di C. Na opinion di e abogado, door di esaki Corte lo por a dicidi cu Ministerio Publico ta no admisible. E abogado a bisa cu ta incomprendibel cu a tarda 8 luna promer cu a bay haci investigacion. E ta haya cu Hof mester reduci e castigo aunke cu dentro di poco C. ta caba di sinta su castigo.
E abogado a mustra cu nan tur tres tabata trip y a bebe. Den auto nan a cuminsa mishi cu otro. Ningun hende a obliga R. pa bay na e apartamento di C. Den e apartamento tabatin relacion sexual caminda ora R. a bisa stop, nan a stop tambe. Na opinion di e abogado, e declaracion di R. ta diferente di loke C. y V. ta bisa pasobra tabatin relacion conhunto. E abogado a bisa cu e hecho cu a haya DNA den parti intimo di R., esey no kier men cu tabatin penetracion. E abogado a desmenti e declaracion di R. cu lo a blokia pa e sali for di e apartamento. Na opinion di abogado, R. no tabata mustra emocial y el a sali for di e apartamento di C. pa warda su amigo. E abogado a conclui cu no tin prueba convicente cu R. a wordo viola y mester declara C. liber.
C. a bisa Hof cu e ta inocente y a sinta casi full su castigo inhusto.
Hof a sera tratamento di e caso y a bisa cu 4 Maart 2026 lo tin sentencia.
