Un bon curason nunca ta defende malicia, maldad y inmoralidad.
Un bon curason ta enemigo di envidia y falsedad.
Un bon curason semper ta acepta coreccion y no ta rebeldia.
Un bon curason ta proclama berdad y decencia.
Un bon curason ta stima y ta cuida interes di otro.
Un bon curason ta puro y berdadero, yena cu amor y humildad.
Ta boca di hende ta revela kico tin den nan curason pasobra e palabra di Dios ta bisa:
E bon hende for di e bon tesoro di su curason ta saca loke ta bon.Y e mal hende for di e mal tesoro, ta saca loke ta malo, pasobra for di abundancia di curason boca ta papia.
Cara bunita no por sconde un mal curason, hopi estudio no por sconde un mal curason, hopi placa cu smile bunita no por sconde un mal curason.
Ora un curason ta malo, e mes ta reda su mes, door di su actitud, y su moda di papia malo y venga y paga malo cu malo.
Pa motibo di mal curason hopi hende ta perde oportunidad den nan bida, pasobra nan kier venga y desea malo pa otro.
Hende di mal curason ta uni cu otro mescos cu un grupo di hyena, pensando solamente con ataca nan prohimo y hopi biaha haciendo uso di scuridad.
Nos hubentud mester tene cuenta pa cay den gara di hende cu mal curason of asocia cu hende di mal curason y hende perverso.
Curason di hende por wordo danja completamente ora nan no tin temor di Dios, ora nan no kier reconoce Dios ( Romanonan 1:28-32). Ora perversidad ta domina y palabra di Dios ta wordo troce.
Bendiciona ta esnan di curason puro, pasobra nan lo mira Dios. ( Mateo 5:8).
Stima Senjor bo Dios cu henter bo curason, y cu henter bo alma y cu henter bo mente, y cu tur bo forsa.( Marco 12:30).
Un curason trankil ta bida pa e curpa, ma envidia ta putrimento di weso.( Proverbionan 14:30)
Un curason contento ta un bon remedi, ma un spiritu abati ta seka weso.( Proverbionan 17:22).
Bendiciona ta e hende cu semper tin temor, ma esun cu haci su curason duro lo cay den calamidad.( Proverbionan 28:14).
Un bon curason ta e fundeshi di fieldad na Dios y na hende, un bon curason ta expresa fe y confiansa den Dios. Un bon curason ta yena cu speransa y confiansa den Dios Todopoderso.
Un bon curason ta duna indicacion di amor familiar, caminda mayor ta haci tur esfuerso pa lanta nan yuinan den bon ambiente y den un educacion firme y berdadero..
Bon curason no ta uni cu maldad, bon curason no ta traiciona hende, pero e ta cla pa bay gera pa husticia por tuma lugar.
Pesey e palabra di Dios ta bisa den Proverbionan 4:23: Warda bo curason riba tur cos, pasobra e ta e fuente di bida,
Warda bo curason for di envidia y falsedad, for di orguyo y arogancia, for di amargura, pasobra amargura ta contagioso e por danja henter un famia.;
Pasobra for di paden for di curason di hende, ta sali mal pensamento. fornicacion,ladronicia,matamento,adulterio,hechonan di cudishi,y maldad. Tambe enganjo sensualidad,envidia, calumnia, orguyo y bobedad,tur e maldanan aki ta sali for di paden y ta contamina hende. ( Marco 721-23).
Dios ta wak tur curason, y E sa ken ta di dj’E.
Curason di hende ta den man di Dios, E tin e ultimo palabra den tur curason.
Laga bo curason bati sla di amor, y no permiti maldad y inmoralidad goberna bo curason.
Sinceramente , Pastor Marcel Balootje
