Museo Arqueologico Nacional Aruba – MANA su acogida den 2024 a sigui ta fuerte. El a ricibi te mita di december un total di 16.000 bishitante di cua 5.300 local y 10.700 turista. Un aumento di 27 % compara cu 2023.
Na actividadnan riba Dia di Betico y Dia di Himno y Bandera comunidad Arubano a acudi masalmente. Esaki tambe a sosode riba Dia internacional di Museo (mei) y Dia internacional di monumento (september). Gruponan di hendenan grandi, mucha chikito (tres -cuater aña) y mucha cu autismo a goza di bishita guia cu actividadnan special desaroya pa cada un. Tambe a brinda programanan dirigi riba studiantenan di Unviersidad di Aruba, rangers di Parke Nacional Aruba maneha pa Fundacion Conservacion Aruba, ekipo di Arutram y un grupo di guiadornan di turista. Tin programa cu a ser brinda den edificionan di MANA y otro na sitionan arkeologico.
Ademas di a percura pa mantencion di exposicion permanente MANA a traha riba e seccion nobo di “Cuentanan di Famia Ecury”. Den dje a incorpora documentarionan cultural traha pa Rebecca Roos Productions y financia door di UNOCA. Tin cu ta conta e historia di e monumentonan den cua MANA ta ubica. MANA ta sumamente agradecido na herederonan di Dundun y Shon Annie Ecury kendenan a regala mueble-, artefacto-, buki- y potretnan di e famia Ecury. Pa 2025 tin mas documentario na caminda cu ta ilustra historia y arkeologia di Aruba y lo finalisa e seccion indica.
Durante 2024 Arte tambe a haya su luga den MANA. E artista invita pa 2024 Sharelly Emanuelson a traha e installacion y presentacion interactivo “Tene A”. E artista invita pa 2025 ta Zoe Velvet Ramos kende lo enfoca riba: “Pasado Presente Interlazado”. Natusha Croes a realisa dos produccion audiovisual artistico titula “Awa ta Bida” y “Lama ta Caminda”. E dos produccionnan menciona a ser realisa cu ayudo di Fondo Cultural Caribe y UNOCA.
A presenta den Fruteria e Poster Expo di Rijksmuseum tocante papel di Hulanda den sclavitud. Aruba su storianan di sclavitud a complementa e exposicion aki. Cu ayudo di entre otro UNESCO Jamaica y Aruba, Archivo Nacional Aruba y UNOCA por a present’e tambe na otro localidad na Aruba. Actualmente tin e exposicion “Putchi Pu’ü cu ta conta e papel di un “Mensahero di Palabra” /Palabrero den cultura di Wayuu/Guajiro.
Den e “Galeria di Arte Moderno” – GAM, cu a ser drecha cu ayudo di TPEF, a presenta pintura y instalacion di cuater artista Arubiano den e exposicion Libertad. Di e forma aki MANA tambe a uni na e conmemoracion 80 aña di fusilamento di Boy Ecury. Meta pa 2025 ta pa ekipa GAM cu instalacion di lus y paneelnan nobo y organisa exposicionnan temporario.
E actividadnan durante 2024 a ser realisa cu ayudo di colaborador- y aliadonan di MANA. MANA ta reconoce e sosten signicativo di Gobierno di Aruba pa medio di Minister di Finansa y Cultura Xiomara Maduro y ayudo di UNOCA.
MANA ta habla danki na su ekipo di trahador- y boluntarionan, na cada organisacion/instancia cu a sosten’e durante 2024, specialmente medionan di comunicacion di Aruba. Cu universo recompensa ricamente cada instancia y persona pa su contribucion y apoyo.
MANA ta confia cu den 2025 e lo ricibi di tur aliado mes of hasta mas sosten cu durante 2024. Ta di e forma aki e lo por continua sirbi comunidad Arubano y turistanan debidamente y cu calidad. Asina tambe MANA por realisa proyectonan den tapara manera drechamento di e monumento “Cas di Mamachi”, parkeo functional y activa espacio di Fruteria cu un tienda di regalo y cafeteria cu caracter Arubiano. Sigui MANA su actividadnan via su website y su pagina di Face Book pa keda na altura di informacion actualisa.
Felis fin di 2024 y cu 2025 trece un cosecha abundante pa cada un di nos…
