Cu gran goso nos ta anuncia, cu diabierna awor 18-4-2025 cuminsando for di 6am ( seis’or di mainta), te cu 8pm ( Och’or di anochi), nos lo tin un marathon di oracion clamando na Dios pa tur cas tur famia, pa nos hubentud, matrimonio, etc..
Lo tin un gran marathon di oracion en vivo for di studionan di HIT94FM pa mundo henter, tambe riba fb, internet, y via plataforma di 24ora.com.
Nos ta celebrando tambe 25 anja hibando e evangelio , alabansa y adoracion tur diadomingo,for di 6am te cu 9am den nos programma Aruba Alaba Senjor.
Awor cu ayudo di Dios, nos ta bay cuminsa un proyecto grandi pa ofrece un servicio altamente necesario;
E plan ta pa construi un Rehab Center pa Damas,pa asina frena e adiccion di droga y alcohol, cu ta atacando fuertemente e ser feminino.
Nos mester atende e asunto aki cu urgencia pa e no sali for di man, pasobra lo ta tristo mira mas hende muhe den adiccion di droga y alcohol.
Mientras cu tur hende su bista ta fiha riba hende homber, cu nos tur ta yama choller, na e otrobanda e ser femenino , tambe ta cay den mesun tentacion.
Ya nos tin trailernan cu cuminsa cu nan reparacion, pasina usa nan como local di instruccion y oficina pa asina cuminsa yuda den e proyecto grandi aki.
Mas despues lo bini un lokaal grandi caminda esnan cu mester di ayudo por keda, y wordo rehabilita.
E plan ta pa cu yudansa di Dios, y cu entrenamiento,ensenansa y productividad cambia bida di esun cu a cay den droga lante bek y hacie un persona util pa comunidad.
Y pa haci esey nos mester di ayudo di henter pueblo di Aruba y Caribe Hulandes, pa asin nos por yega na 10.000 persona cu por haci un donacion di 25, 00 florin pa asina nos por yega na 250.000,00 florin y cuminsa cu e proyecto, pasobra e tereno ta pidi y paga caba, mester sera e tereno y cuminsa construi.
Nos tin pleno confiansa cu di parti di gobierno nos lo wordo yuda.
Nos sa cu tur cos ta posibel pa esun cu ta kere, y cu fe y confiansa den Dios, nos ta pidi pueblo henter pa uni den oracion , diabierna awor hunto cu nos, pasobra ta un mandato di Dios pa nos uni den oracion ( Mateo 18:19).
Y nos tin e pleno confiansa cu Dios lo toca curason di hende pa nan duna y cu nos por alcansa e suma cu nos mester pa cuminsa cu e projecto. Nos tin mester di 10.000 hende of mas cu nan curason ta alegre pa duna , ora nan ta sinti e necesidad cu mester cumpli cune.
