Un mucha mester di amor y atencion di su mayor,y nada material no por reemplasa e tempo y amor di mayor.
Nan a purba cu nintendo, nan a purba cu tablet, nan a purba cu tv, laptop, internet, tvgames, nada di esey no por a reemplasa e atencion di mayor.
Un mucha kier papia cu su mayor ,
E mucha kier hunga cu su mayor,
E mucha kier hari cu su mayor,
E mucha kier scucha un cuenta for di su mayor su boca,
E mucha kier pa su mayor lesa un historia pa e tende , pa e por haci pregunta na su mayor.
Pasobra tin cos cu solamente su mayor por splike pa e compronde, y ora e mayor no tin tempo, e mucha tin dolor na su curason, cu cosnan material no por yude.
Anto ta esaki ta pasa cu tin tanto mucha riba caya, buscando experiencia caminda no tin, y asina ta cay den man di “Lobo Feroz” y malbado nan cu ta cana wak yiu di hende pa danja y destrui.
Ora un mucha no por hanja un contesta na cas e ta bay puntra riba caya, y hopi biaha caya no tin ningun clase di interes den e mucha su bienestar, asina e mucha ta hanja un contesta cu no ta bon pe.
Ora nos neglisha tempo cu nos yiu, nos ta aumenta e risico pa e mucha trompica den su bida, pasobra ta nos deber y ta un mandato di Dios pa nos stima nos yiu y traha tempo pa nos yiu.
No duna un mucha tur tipo di libertad, pa e keda contento cu bo, pasobra educacion no ta negociabel.
Bo no por negocia cu un mucha, pasobra e negociacion lo para bira manipulacion segun e mucha ta crece, pasobra e enemigo lo cohe bentaha den bida di e mucha, y e ta bin pidi bo cosnan cu bo no por cumpli cune.
Hopi hende ta keda stranjo con un mucha ta cambia, pero nan ta lubida, cu ningun momento cu nan mester tabata na cas nan no ta na cas, y nan ta prome cu ta bisa cu muchanan di awor sa tur cos, y caba e muchanan no sa nada di bida, pasobra nan no a wordo educa door di nan mayor.
Wak bon kon duro e asunto di bully por dal un mucha, pero si e tin e amor di cas, e tempo, e atencion di cas, e bully no por hacie danjo, pasobra na cas nan lo haci oracion. Y sinja e mucha con ta resisti e asunto di bully sin tin cu bay den violencia.
Ma Hesus a bisa laga e muchanan bini serca Mi, pasobra e reino di cielo ta pertenece na esnan manera esaki nan.
Mescos cu Dios ta stima mucha, nos tambe mester stima nos yuinan, pasobra Dios no tin nieto, ta nos tur ta yiu di Dios.
Conosemento ta haci arogante,ma amor ta edifica. Si un hende ta kere cu e sa algo,ainda e no sa manera e mester sa. Ma si un hende ta stima Dios, e ta conoci pa Dios.( Romanonan 8:1-2).
Yuinan sea obedecido na boso mayornan den tur cos, pasobra esaki ta agradabel Senjor.( Colosensenan 3:20).
Ta bon pa sinja nos yuinan lo siguiente: Mi yiu si pecadornan tenta bo no consenti. Mi yiu no anda cu nan, no laga bo pia cohe nan caminda,pasobra nan pia ta corre bay na maldad, y nan ta lihe pa drama sanger.( Proverbionan 1:8-15).
Awor mas cu nunca ta tempo pa pone atencion na nos yuinan.
Sinceramente, Pastor Marcel Balootje
