E november aki, Costa Linda Beach Resort ta alcansa un momento special: 35 aña desde cu el a duna su prome bishitante bon bini dia 1 di november 1991. Situa na Punta Brabo, na cuminsamento di Eagle Beach, Costa Linda a bira un parti familiar y hopi stima di e historia di timeshare na Aruba.
E resort a keda desaroya pa Raymond Maduro, un di e pioneronan cu a yuda introduci y establece timeshare na Aruba. Den e epoca ey, timeshare di luho ainda tabata un concepto relativamente nobo riba nos isla. E idea di ta doño di un lugar den Caribe pa regresa aña tras aña eventualmente lo a bira un parti importante di e industria turistico di Aruba.
Actualmente, e resort di cinco piso tin 155 unidad, incluyendo suitenan amplio cu dos y tres camber, y e luhoso suitenan Frangipani. Su ubicacion na canto di lama, cu bunita bista riba lama y mas cu 700 pia di playa, ta sigui ta un di su atraccionnan principal.
Pero, e legado di un resort ta bay mas leu cu su ubicacion y facilidadnan. Ta e hendenan cu ta haci’e special. Costa Linda tin un tradicion largo di reconoce e dedicacion di empleadonan cu a pasa decadanan atendiendo doñonan di timeshare y bishitantenan, algun di nan desde e prome añanan di e resort.
Su structura di propiedad tambe ta distingui e resort: Costa Linda ta propiedad di, y ta goberna pa un asociacion cooperativo forma pa su doñonan di timeshare.
Mientras Costa Linda ta acerca su di 35 aniversario, e ta celebra mucho mas cu e paso di tempo. E ta celebra e encanto duradero di regresa na un lugar familiar, bolbe encontra cu amigonan y famia, y crea recuerdonan nobo riba One Happy Island.
