Dialuna mainta durante conferencia di prensa di Gobierno di Aruba, Prome Minister Evelyn Wever-Croes a duna un update di Covid 19 na Aruba uzando e ultimo cifranan di diabierna 8 di april 2022. E siman a cera cu 84 caso activo, un mehoracion liviano di e siman prome na unda tawata tin 87 caso activo. Esaki, Prome Minister a bisa, ta un muestra cu Aruba ta bayendo den e bon direccion door di mantene nos cifranan abou. Comparando e cifranan, Corsou ta riba 500 actualmente. Aruba na 84 mientras algun siman prome e tawata rond 40. Esaki ta mustra cu e virus tey ainda.
Actualmente, tin dos persona hospitalisa y niun persona den Cuido Intensivo. E positivity rate, cua ta e cantidad di personanan cu ta test positivo, ta aumentando un tiki. E virus tey ainda y ta keda importante pa cada ciudadano sigui cuida. Vacunacion ta keda e manera mas efectivo pa cuida nos mes.
Pa e edad di 60+, e grado di vacunacion pa e prome dos vacunanan ta na 86% y pa e di tres vacuna e ta na 51% indicando cu e interes den vacuna a cuminsa baha. Esnan riba 18 aña, e grado di vacunacion pa e prome dos vacunanan ta na 79% y pa e di tres vacuna e ta na apenas 33%. Pa loke ta e di cuatro vacuna, e di dos booster, e ta accesibel pa esnan di 60+ y pa esnan riba 18 aña cu problemanan di salud y te ainda ta rond di 1000 persona cu a busca e di dos booster. E sistema di vacanacion ta accesibel y gratis pa tur hende ainda. “Mi ta haci apelacion na un y tur pa nos sigui vacuna”, Prome Minister a expresa.
Por vacuna tur dia den oranan di trabou den siman na DVG na Playa y tambe na e unidad mobiel. E siman aki e unidad mobiel lo ta haciendo trabounan di mantencion y dia 20 di april e lo ta staciona na Compleho Deportivo Frans Figaroa na Noord pa un siman y despues lo wordo anuncia unda e lo ta staciona.
“Gobierno di Aruba hunto cu CrisisTeam ta vigilando e tur desaroyo di Covid internacionalmente tambe. Te ainda no tin niun indicacion cu na Aruba mester ta preocupa cu un otro variante di Covid of pa aumento di casonan. Pero e 84 caso activo cu tin actualmente na Aruba, ta potencial pa sigui plama y pega otro hende. “Ta keda den nos man pa stop e plamamento”, Prome Minister a termina bisando.
