Desaroyo monetario
Compara cu november 2021, e cantidad di placa den circulacion a subi cu Afl. 114,6 miyon te na Afl. 5.368,1 miyon den e luna di december 2021. Esaki a resulta for di crecemento den tanto e activo domestico netto (+Afl. 309,7 miyon) y den e reserva di divisa netto (+Afl. 4,8 miyon).
E expansion den e activo domestico netto a wordo causa pa un aumento den credito domestico (+Afl. 114,7 miyon) y un caida den transaccionnan no relata na credito (-Afl. 4,9 miyon). E subida den credito domestico a resulta for di crecemento den credito bancario netto na e sector publico (+Afl. 101,8 miyon) y credito bancario na e sector priva (+Afl. 12,9 miyon). E subida den credito bancario netto na e sector publico ta wordo atribui na un bahada den deposito di gobierno (-Afl. 104,4 miyon), mientras cu e aumento den credito bancario na e sector priva a wordo causa pa mas credito na empresa (+Afl. 10,0 miyon) y hipoteca pa vivienda (+Afl. 8,3 miyon). Di otro banda, credito na consumidor (-Afl 5,4 miyon) a baha.
Na december 2021, e subida den e reserva di divisa netto a wordo causa pa compra netto di divisa di Afl. 302,6 miyon di publico, principalmente relaciona cu entrada for di turismo y otro servicionan. Esaki a wordo casi completamente mitiga pa benta netto di divisa di Afl. 297,8 miyon na publico, primordialmente relaciona cu pago pa importacion y transferencia netto di cuentanan den exterior di companianan local.
Inflacion
E nivel general di prijs, cu ta wordo midi door di e indice di prijs di consumo, a registra un subida di 3,6 porciento den e luna di december 2021 compara cu december 2020. E contribuyente principal na e aumento aki tabata e categoria “transporte”. Pa loke ta trata e promedio anual di e tasa di inflacion, esaki a registra 0,7 porciento na december 2021, compara cu 0,2 porciento na november 2021.
Entrada di Gobierno
Entrada total di gobierno a suma Afl. 127,7 miyon na december 2021, cual ta Afl. 10,5 miyon mas cu e mesun luna di e aña anterior. Esaki a resulta for di subidanan den tanto entrada di impuesto (+Afl. 9,6 miyon) y entrada no relata na impuesto (+Afl. 1,0 miyon).
E aumento den entrada di impuesto a wordo causa principalmente pa mas entrada for di impuesto riba importacion (+Afl. 5,4 miyon) y riba e asina yama “turnover tax” (B.B.O.,B.A.V.P.) (+Afl. 5,1 miyon). Di otro banda, entrada for di impuesto riba ganashi (-Afl. 12,7 miyon) a baha.
Turismo
Na december 2021, e cantidad di turista a registra 89.541 turista, cual ta 11.172 menos bishitante (-11,1 porciento) compara cu na december 2019. E mercadonan Norte Americano, Latino Americano, y Europeo a baha cu 9.329 bishitante (-11,4 porciento), 1.579 bishitante (-18,7 porciento), y 294 bishitante (-3,9 porciento), respectivamente.
Banco Central di Aruba
