Nos por mira claramente cu den Bijbel e tradicion di Israel, cu tabata e prome pueblo escohi di Dios Tata, nan ta dera semper nan curpa morto. Mientras cu den mundo tin pueblonan den creencianan paganismo, reencarnacion y ocultismo satanico, nan si ta crema y ta kima nan curpa morto. E Hudiunan no ta permiti cremacion di curpa den nan pais. Tin iglesianan na mundo no ta permiti cremacion di curpa. Bijbel ta bisa, cu nos curpa ta bira stof manera cu mester ta durante tempo, pero Bijbel no ta bisa, cu nos curpa ta bira shinishi pa medio di kimamento di curpa. E tradicion di deramento di curpa, ta wordo demostra den Bijbel Testamento Bieuw y tambe den Testamento Nobo. Lesa loke Bijbel ta bisa den 1 Corinthionan 15: 44, Apostel Pablo ta bisa: “Ta dera un curpa mortal y un curpa spiritual ta lanta for di morto.” Den Bijbel Genesis 23: 19, ta bisa: “Despues Abraham a dera su senjora Sara den e cueva Makpela, pariba di Mambre, esta na Hebron na Canaan.” Den Bijbel 2 Kronikanan 16: 13 y 14 ta bisa: “Asa a bay sosega cerca su antepasadonan den e di 41 anja di su reinado. A dera Asa den su graf cu el a laga coba den e ciudad di David.” Den Bijbel Huan 11: 43 y 44: “Despues di a resa asina, Hesus a bisa na bos halto: “ Lazaro, sali pafor.” E defunto a sali cu man y pia lora den panja y cara mara cu lenso. Hesus a bisa nan: “Kita e panjanan ey for di su curpa y lag’e bay.” Den Bijbel Mateo 27: 59 y 60: “Hose di Arimatea a cohe e curpa di Hesus, a lor’e den un panja nobo di lenen y a pon’e den su mes graf. Tabata un graf nobo cu el a laga coba den baranca.” I tin hopi mas capitulonan den Bijbel cu ta papia di deramento di curpa y no di kimamento di curpa. E curpa di tur ser humano ta wordo crea pa Dios Tata y Dios Spirito Santo ta biba y ta move den nos curpa y ta haci nos curpa un instrumento di honor pa Dios Tata. Por mira e curpanan di e Cristiannan y di e Santonan cu a muri hopi siglonan pasa y nan curpa a keda intacto, incorumpibel pa motibo di nan bida santo. Por ehempel, San Padre Pio, Sta. Bernadette Soubirous, Sta. Cecilia, San Huan Bosco, San Juan Vianney, San Francisco de Sales, San Vincent de Paul, Santo Papa Pius V, Santo Papa Juan XXIII, Santa Ana Maria Taigi, Santa Agatha y hopi mas defuntonan cu a muri y nan curpa a keda incorumpibel. Pesey ta con un famia y Iglesia ta permiti cremacion di curpa di nan ser stima y mientras cu Cristo-Hesus kier pa curpa di hende keda incorumpibel pa motibo di nan bida Cristian y santo? Cristo-Hesus mes a wordo dera y E’l a lanta Su mesun curpa for di morto, p’esey tur hende Cristian ta kere cu nan deramento den santana ta un testimonio pa e Resureccion cu tin di bini. Nos curpa ta tempel di Spirito Santo y p’esey nos curpa mester wordo trata cu honor y cu respet. Ta con un famia lo bai sinti, cu nan ser stima a pasa pa medio di candela ardiente y a bira shinishi? Na mundo tin hendenan cu ta den creencianan pagano, den ocultismo satanico, den reencarnacion etc. y nan si ta crema y ta kima nan curpa morto, pasobra nan ta kere den reencarnacion y nan ta kere den diosnan falso. Un Cristian den Cristo Hesus mester comprende bon kla, cu den e di Prome Mandamento, Dios Tata ta prohibi nos pa no kere y pa no imita e creencianan pagano, den reencarnacion, den diosnan falso etc.. Pasobra tur e creencianan y imitacionnan aki ta condenabel den fierno pa Dios Tata. Awor, si nos pensa bon cu e kimamento di curpa di hende morto, no ta bini di Dios Tata, pero e ta bini di creencianan cu ta contra di Dios Tata Su Leynan. Awor, ta e famianan ta keda responsabel, si ta dera nan defuntonan manera cu Dios Tata kier of manera e otro creencianan di mundo ta haci. E responsabilidad aki ta keda pa cada un di nos dicidi segun consenshi.
Un mensahero di Dios.
