Recientemente gobierno a suspende director di Elmar, Anthony Irausquin. E decision aki ta uno sin transparencia, sin direccion y sin profesionalismo. Director di Elmar a wordo reemplaza pa Eric Tromp, un ingeniero cu segun informe interno, no por maneha su propio departamento, pero pa motibo cu ta intimo amigo di Richard Frank e’la logra pa bira director interino di Elmar entrante 3 di october 2025.
E team di maneho di Elmar a keda hopi sorprendi cu e decision aki. Segun rumor, no a nombra Albertico Koolman pa motibo cu Albertico Koolman tambe ta riba e lista pa wordo suspendi.
Segun nos por a sigi noticianan desde anja pasa, 3 empleado di e departamento cu ta resorta bao di Eric Tromp a wordo kita for di trabao pa casonan fraudulento di solar panels, unda aparentemente Eric Tromp tabata sconde y proteha e empleadonan cu a wordo kita for di trabao.
Segun fuente anonimo, Eric Tromp nunca kier a tuma iniciativa pa para e grupo aki pa motibo cu e mes tabata parti di e grupo aki cu tabata haci negoshi cu Solar Panels den pasado caba. Tambe tin sospecho cu Tromp ta haci negoshi hunto cu algun coleganan den WEB. E fuente ta bisa cu tin hopi keho den Elmar ariba Eric Tromp.
Desde cu e gobierno nobo a sinta, a cuminsa ta kita tur comisarionan di Utilities Aruba, pa despues sigi na kita Ton Rojer for di trabao.
Frank Hoevertz y su grupoto di WEB a crea hopi storia ariba Ton Rojer pa asina por a logra suspende pa 3 luna pa despues kita Ton Rojer for di trabow. Awor Ton Rojer tin un caso contra Utilities Aruba pendiente. Locual mayoria hende a bin ta anticipa ta cu lo sigi pa kita tur e comisarionanan di Elmar y WEB for di nan funcion. Na momento cu esaki wordo ehecuta e Gobierno nobo por pone su hendenan pa nan por sigi cu nan fiesta. E comisarionan di WEB y Elmar a lanta un caso contra Utilities Aruba y nan a gana.
E team di Mike de Meza encabeza pa Frank Hoevertsz ta sigi cu nan fiesta y ta crea awor hopi storia ariba Anthony Irausquin, director di Elmar. Tur esaki pa crea un smoke screen pa asina purba kita e director for di trabow na e mes manera cu nan a haci cu Ton Rojer. Pa colmo Frank Hoevertsz tabatin hopi pura pa nombra Richard Frank como comisario na Elmar tambe y regla tur asuntonan na Camara di Comercio pa asina por suspende Anthony Irausquin.
Ta director Anthony Irausquin mes mester a firma e documentonan di Camara di Comercio pa asina Richard Frank por suspende Anthony Irausquin y por sigi cu e fiesta di AVP den Elmar. E Hunta di Supervision mester consisti di por lo menos 3 miembro y a compronde cu Richard Frank ta actua su so den Elmar. Richard tabata traha di cerca cu un secretaria cu ta un fuente di informacion pa partido AVP den Elmar. Pues Richard Frank ta comisario na Elmar y Utilities Aruba cu 2 salario di comisario pa mas cu 8.000 florin pa luna pa algun ora di trabow. Nos tur por corda cu Richard Frank a haya un pakete miyonario for di WEB y awor a bin bek como comisario na Utilities Aruba y Elmar. Richard su meta ta pa bira director di WEB y pesey a wordo nombra como comisario na Elmar y no na WEB.
Frederick Nuboer cu a wordo nombra como comisario na Utilities Aruba a wordu rechaza door di e lendersnan. Awor ex-director di Elmar, Robert Henriquez a wordu nombra como director na RDA hunto cu Frederick Nuboer como Financial Controller cu salarionan astronomico.
For di Bestuurskantoor tin informacion cu Minister Herde no tin nada di bisa den e sector di Energia. Pa colmo a kita e cartera for di dje. Ta Mike de Meza ta e persona cu ta dicidi ariba Minister Herde. Nos a bin compronde tambe cu despues cu 24ora a lastra y intimida Anthony Irausquin pa mas cu 4 anja largo, e mesun Anthony Irausquin a wordu forza pa firma un contrato cu 24ora pa un suma astronomico pa luna.
Joseph Everon, director actual di Utilties Aruba mes a informa ariba esaki den bestuurskantoor. Den pasado, Gobierno di AVP a paga casi 2 miyon florin caba na Patrick Paskel y Nelson Andrade y awor ta bolbe de Gobierno di AVP pa sigi cobra sumanan grandi. Segun fuentenan, Anthony Irausquin a wordo menaza y a wordu intimida door di comisarionan di Utilities y bullied door di e 2 directornan nobo di Utilities cu a bin di WEB. Actualmente tin menazanan tambe ariba e Operations Manager Albertico Koolman, kende tabata director interino den pasado cu ta casa cu e supervisor di Customer Service. Aparentemente Albertico Koolman nunca a preocupa pa un bon plan di mantenshon ariba e grid di Elmar pero tambe pa motibo cu hunto cu su senora a proteha un grupo cu a comete un fraude grande entre 2013 – 2019. Un grupo di americano mester a bin asisti cu e parti technico. E pareha Koolman aki ta gana hunto mas cu 35.000 florin pa luna y awor a wordo poni un banda pa nombra Eric Tromp. Segun fuentenan den Utilities Aruba, Albertico y senora tabata parti di e grupo aki cu ta sinti nan mes hopi fuerte pa motibo cu nan ta wordo proteha door di Gobierno. Tempo di e fraude aki ta Frank Hoevertsz mes tabata director di Utilities Aruba y awor kier regla e cuenta bieuw aki.
Awor e Gobierno nobo aki lo bolbe bai habri e caso aki y investiga e grupo aki cu a comete un fraude grandi tempo di Robert Henriquez. Nos por mira un situacion aworaki unda ta ex-empleadonan ta na cabes di Utilities Aruba, Elmar y AWSS y naturalmente na WEB. Kisas a jega tempo pa pone hulandesnan na cabez di Elmar y WEB pa asina por sigi cu e limpieza den Elmar manera a haci na aeropuerto ? Un fuente anonimo a sugeri. Frank Hoevertsz a fungi pa basta anja como director di Utilities Aruba y no a logra nada y si e companianan estatal sigi awor den man di Frank Hoevertsz, Aruba no por spera nada bon. Joseph Everon y Randolph Ruiz ta wordo obliga pa firma tur locual Frank Hoevertsz pone nan dilanti. Frank Hoevertsz kier maneha a base di redonan. Lendersnan mester ta hopi cauteloso cu e grupo aki. Mescos cu Geoffrey Wever ta papia di dividend policy y Corporate Governance, lendersnan mester ta mas cuateloso ainda, pa e hecho cu a logra bypass e lendersnan te na e momentonan aki, mientras WEB ta haci inversionnan grandi y prijs di awa y coriente no ta baha. Awor cu a kita e cartera for di Minister Herde e fiesta lo bira mas grandi ainda. Minister Herde no por a controla e grupito di WEB aki cu ta haya forza ariba Elmar.
E fuente anonimo a laga sa cu tin mas desaroyo y a priminti di sigui informa Solo di Pueblo.
