Cristianismo ta referi na honor, stimacion, reverencia, y obedencia na Dios.
Cristianismo no por wordo compara cu un label, pasobra e amor cu nos tin pa Dios, ta wordo refleha den nos bida, pasobra e manera cu nos ta trata Dios ta sali pa dilanti, den tur locual nos ta haci.
Dios mester tin e prome lugar den nos bida, pero asina cu nos tin prioridadnan cu ta mas halto cu Dios, nos ta para riba nos mes, pasobra Dios Su palabra ta bisa nos cu E ta e mata di wijndruif y nos ta e ramanan , pega den Senjor nos por tur cos, leu for di Senjor nos no por nada.( Juan 15:5).
Nos no por trata Dios con cu ta, y bisa cu nos ta bendiciona, nos mester trata Dios cu respet, pasobra Dios ta donjo di tur cos.
Tur hende tin respet, pa nan trabao, sino nan ta perde nan trabao, pero esey no ta nifica cu asuntonan cu nos tin cu atende cu Dios, nos tin cu haci nan con cu ta, of keda sin haci nan mes, pasobra nos no tin tempo. Nos mester traha tempo pa Dios.
Hopi hende ta hanja oportunidad pa sirbi Dios, pero nan kier haci cos cu nan kier y cu murmuracion y asina spera cu Dios tin cu acepta nan conducta, for di den Genesis Dios a mustra Cain cu e no ta acepta cosnan con cu ta, y esey mester ta un ehempel pa nos tur.
Dios ta un Dios di orden y orden ta cuminsa cu respet, pasobra ora nos falta respet na un hende, nos ta falta respet na Dios, pasobra e hende ey a wordo traha den imagen y semehansa di Dios.
Ora hende ta respeta Dios tur cos ta bay bon cu nan, nan no tin mester di ta rico, pero e obediencia y respet cu nan tin pa Dios, ta habri porta di fabor di Dios den nan bida.
Hende cu no ta respeta Dios, tur ora ta critica, y tur ora ta negativo, y tur ora nan ta sinti nan mes cansa, yen di stress, decepciona, pasobra nan no tin respet pa Dios, nan confiansa den Dios ta temporal, nan mes no tin pasenshi cual ta demostra nan confiansa den Dios.
Nos mester agrada Dios mas cu nos propio deseo, santidad y puresa mester ta presente den nos bida.
Un berdadero Cristian no por tin un tempo cu e ta bay contra boluntad di Dios, pa haci su propio boluntad cu absolutamente no ta agrada Dios, por ehempel pa participa den adoracion di Dios falso, y den fiestanan cu imitacion di demonjo, y despues ta bini bek serca Dios manera nada no a pasa, nos tur por haci algo robes , pero ora e bira custumber y tradicion, e ta un falta di respet pa Dios.
Pesey como nos ta ricibi un reino cu no por wordo sacudi,laga nos mustra gratitud, pa medio di cual nos por ofrece na Dios, un sirbishi aceptabel,cu reverencia y temor. Pasobra nos Dios ta un candela consumidor.(Romanonan 12:28).
Pa gracia nos ta salba, pa medio di Fe, pero gracia no ta duna nos libertad pa haci pica, ni tampoco bolbe bek na sclavitud di pasado.
Nos tur debe respet na Dios, pasobra Dios a crea nos tur den Su imagen y Su semehansa, nos curpa ta tempel di Senjor y e Spirito di Dios ta biba den nos, nos no ta di nos mes, nos a wordo cumpra cu un preis, pesey nos tin di honra Dios den nos curpa.( 1 Corintionan 6:19).
Respet pa Dios, ta indentifica nos bida.
Sinceramente, Pastor Marcel Balootje
