Den Lucas 11:23 e ta para scirbi; Esun cu no ta cu Mi,ta contra Mi,y esun cu no ta recohe hunto cu Mi ta plama.
Ta masha dificil pa bay contra e palabra di Dios, y bo ta sperando bendicion di Dios, pasobra Dios ta wak bo curason, pasobra for di curason di hende ta sali cosnan bon y cosnan malo, y nos mester tene cuenta cu henter nos curpa ta Tempel di Spirito Santo.
Wak pa bo no ta stroba hende di sirbi Dios, stroba hende di bay nan servicionan,stroba hende di kere den locual nan ta ricibi di Senjor, tene cuenta cu ora e palabra di Dios wordo predica y bo no ta respeta, no ta esun cu ta trece e palabra bo no ta respeta, sino ta Dios bo no ta respeta.
E asunto aki ta mas delicado cu nos por kere cu e ta, teniendo cuenta cu:
Tin dos tipo di creyente of mihor bisa dos tipo di cristian.
Tin creyente carnal y tin creyente spiritual ( Galationan 5;16-21) y (Galationan 5:22).
Tin creyente cu ta entrega completamente na Senjor y tin cu no ta entrega completamenta, pero ta laga espacio pa cosnan di mundo.( Romanonan 6:13 y Romanonan 12:1).
Tin creyente cu keto bay ta mescla nan mes den yugo desigual ( 2 Corintionan 6:14-18).
Tin creyente mundano y no spiritual.( 1 Corintionan 3:16-17).Nan no kier ta fiel na Dios,
Tin creyente cu no kier ningun encargo y no kier somete na Dios. ( Mateo 11:29). Nan no tin tempo pa cosnan di Dios.Nan no ta disiplina.
Tin creyente cu no tin un bida di oracion ( Mateo 6:6)
Tin creyente cu baymento di iglesia no ta un prioridad pa nan. ( Hebreonan 10:25).
Hopi biaha atakenan ta bini riba nos bida, sin cu nos tene cuenta y cos ta ripiti sin nos sa.
Imaginabo cu tin hende den cas cu net ora tin cu prepara pa bay iglesia na ta cuminsa cu un discusion, cu ta causa cu ta yega laat, of ta keda sin bay , tirando culpa riba otro.
Ora tin cu haci oracion nan ta cuminsa sinti tur sorto di dolor, cu nan no por participa, especialmente dolor di cabes.
Ora di bay fiesta di famia of amistad den siman nan por drumi laat, pero pa un anochi di oracion nan ta reclama cu nan ta perde sonjo.
Tur eseynan ta haci nos consciente cu e enemigo ta presente pa evita cu nos ta somete y sirbi Dios di henter nos curason.
Mi pueblo ta wordo destrui pa falta di conocemento.( Hosea 4:6).
Nos mester busca conocemento como mayor pa guia nos yuinan den caminda di Dios, pasobra ningun hende por duna locual cu e no tin.
Confia den Senjor cu henter bo curason, y no depende riba bo mes comprendemento, Den tur bo caminda nan reconoc’E, y E lo dirigi bo berehanan.
Anima bo yuinan pa sirbi Senjor mas cu bo ta anima nan pa practica cualkier deporte, pasobra tur cos ta pasahero, pero nos Dios ta eterno.
Awendia a lanta hopi, pero hopi biento di doctrina falso y fabula di demonjo, cosnan cu ta dificil pa splica con hende por laga diabel ganja nan asina tanto te nan kier obliga hende pa kere nan mentira y hasta ta purba legalisa mentira, pa asina e generacion nobo cu ta lanta keda pega den scuridad.
Tur locual y tur hende cu ta contra e palabra di Dios, ta contra Dios, tur hende cu ta contra e principionan di Dios ta totalmente contra Dios. Sinceramente, Pastor Marcel Balootje
