Haci oracion tur dia den bo cas, y sinti y mira cambio den bo famia, haci oracion pa bo yuinan, pa bo esposa/esposo, pa tur locual cu Dios a duna bo, pa bo trabao , pa bo finansas, pa bo salud, pa bo wordo proteha di maldad, haci oracion pa tur hende den nomber di Cristo Hesus.
Awor dicon bo tin cu haci oracion y peticion den nomber di Cristo Hesus?
Pasobra Cristo Hesus mes a bisa:
Y tur loke boso pidi den Mi nomber,esey lo Mi haci, pa e Tata wordo glorifica den e Yiu. Si boso pidi algo den Mi nomber, lo Mi hacie. ( Juan 14;13-14).
Boso no a scohe Mi, ma Ami a scohe boso,y a nombra boso,pa boso bay y duna fruta, y cu boso fruta lo keda, pa tur loke boso pidi e Tata den Mi nomber, E lo duna boso.Esaki Mi ta ordena boso, pa boso stima otro.( Juan 15:16-17).
Riba e dia ey boso lo no haci Mi ningun pregunta, Di berdad, di berdad, Mi ta bisa boso,kico cu boso pidi e Tata , Elo duna boso den Mi nomber. Te ainda boso no a pidi den Mi nomber, pidi y boso lo ricibi, pa boso goso por ta completo.( Juan 16:23-24).
Atrobe Mi ta bisa boso, cu si riba tera dos di boso bay di acuerdo tocante di cualkier cos cu nan pidi,esaki lo wordo haci pa nan door di Mi Tata cu ta den cielo.( Mateo 18:19).
Awor un hende por puntra dicon mester obedec’E y haci locual cu E ta bisa?
Pesey tambe Dios a hals’E te na e alturanan, y a dun’E e nomber cu ta riba tur nomber, cu pa e nomber di Hesus tur rudia mester dobla, di esun cu ta den cielo, y riba tera,y bao di tera.
Y cu tur lenga mester confesa cu Hesus Cristo ta Senjor, pa e Gloria di Dios Tata.( Filipensenan 2:9-11).
Tene bon cuenta cu tin cosnan nobo cu ta sali pa dilanti awor , cosnan falso cu no tin ningun rais biblico, cual ta oracion na angelnan. Nos tur mester sa cu Lucifer tabata un angel , pero door di su rebeldia contra Dios e a cay y ta wordo yama satanas. Bijbel ta menciona e Angel di Senjor, tambe ta wordo menciona e Archangel Miguel ( Judas 1:9) y (Daniel 10;13) y tambe angel Gabriel ( Lucas 1:26-38).
No ta existi ningun angel di horoscope pasobra e no ta biblico, mester tene bon cuenta riba nomber di ken bo ta yama, pasobra yamamento di nomber di un angel ,cu no tin aprobacion di Dios ta peligroso.
Haci oracion constantemente den bo cas, alaba Dios den bo cas, haci oracion pa bo yuinan, pa bo bario, pa bisinja, pa yuinan di bo bisinja, haci oracion y reprende, inmoralidad, accidente, violencia.
Pasobra esey ta e boluntad di Dios, Dios ta scucha y Dios ta defende bo hogar y bo famia y tur locual tin rond di bo.
Caminda tin union y oracion Dios ta manda su bendicion, Dios ta scucha bo oracion, pa Dios nada ta imposibel, no tin limite pa Dios, e ta Dios di misericordia y abundancia.
Cristo Hesus ta garantisa nos cu oracion haci den Su nomber, ta wordo contesta pa Su Tata cu ta den cielo, pasobra Cristo Hesus ta e unico mediador entre Dios y hende.
Awor mas cu nunca, nos tur mester tene na cuenta cu oracion ta mas cu necesario den nos hogar.
Laga nos haci oracion tur momento.
Sinceramente, Pastor Marcel Balootje
