Placa por cumpra hende, pero placa no por cumpra tur hende.
No ta tur hende ta bende nan mes pa placa, of nan consenshi por wordo cumpra pa placa.
Tin hende a yega asina leu di sconde abuso pa placa,
Tin hende a acepta placa pa bay contra di husticia.
Tin hende ta bende na mes curpa pa placa.
Tin hende ta bende nan idea y vision pa placa.
Tin hende ta paga castigo di otro den prison pa placa.
Tin hende ta bende nan famia pa placa.
Tin hende ta lubida riba nan yuinan pa placa.
Tin hende ta soporta abuso anja aden anja afo pa placa.
Tin hende ta sconde malbado pa placa.
Placa a hinca hopi hende den inmoralidad, kibra hopi matrimonio.
Crimen ta wordo cometi pa motibo di placa.
Placa a pone hende bay perdi, mental y fisicamente,
Den e tempo trabahoso cu nos ta biba aden ,
Placa a bira un arma contra decensia, respet y dignidad y hopi hende a perde nan integridad pa motibo di nan amor pa placa.
Y ta pesey nos no por lubida. nos tin di corda e preis cu Cristo Hesus a paga pa nos tur na crus, y no solamente esey: Nos tin di corda cu Dios a stima mundo asina tanto cu e a duna Su yiu unigenito pa ken cu kere den dj”E no bay perdi ma tin bida eterno.
E a paga un preis cu placa no por paga, e preis di nos salbacion no tin moneda na mundo ni tampoco, plata, oro of diamante of cualkier otro piedra precioso, cu por cumpra salbacion.
Den un palabra bisa placa no por cumpra cosnan di Dios, pasobra e poder di Dios ta manifesta den humildad, pasobra pa e rico drenta den presencia di Dios, e tin di pone su rikesa, su orguyo y su arogancia un banda , bira humilde pa e por drenta den presencia di Dios.
Un malbado ta acepta placa pasa bao di mesa , pa trose e caminda di husticia ( Proverbionan 17:23).
Pesey Cristo Hesus a bisa: Ami ta e caminda, e berdad y e bida, ni un hende por yega serca e Tata si no ta pa medio di Mi.
Esey ta nifica cu e caminda pa cielo no por wordo cumpra, e ta exigi un entrega total na Dios, caminda Dios tin e prioridad den nos bida pasobra nos mester tin temor di Dios.
Ora un hende no kier tende e nomber di Dios wordo menciona hopi biaha, esey ta nifica cu tin falta di conocemento, rechaso di Cristo, y tambe e no kier reconoce Dios y kier sigi biba den scuridad.
Of boso no sa cu boso curpa ta tempel di Spirito Santo,Kende ta den boso,kende boso tin di Dios,y cu boso no ta pertenece na boso mes.Pasobra boso a wordo cumpra pa un preis, pesey glorifica Dios den boso curpa.( 1 corintionan 6:20).
Pasobra amor pa placa ta rais di tur sorto di maldad, y algun hende door di desea esaki,a desvia for di e fe, y a traspasa nan mes cu hopi dolor.( 1 Timoteo 6:10).
Pesey tur mayor mester spierta nan yiu pa no bende nan mes pa placa, no laga hende cumpra nan ni cu placa tampoco cu cos, sinja bo yiu mantene su balor, su integridad, desencia y puresa.
Hende mester tin dominio riba placa, y no placa ta domina hende, ora bo tin placa keda un hende normal . Mescos cu ora bo no tin placa.
Pasobra Dios ta mas grandi cu placa.
Sinceramente, Pastor Marcel Balootje
