Dicon nos ta bisa e Unico, pasobra Cristo Hesus a bisa den Mateo 28:18 : Tur autoridad a wordo duna na Mi den cielo y riba tera.
Solamente Hesus por bisa; Bin serca Mi tur cu ta cansa y carga y lo Mi duna boso sosiego.(Mateo 11:28).
Y den Filipensenan 2:10-11 ta para scirbi: Cu pa e nomber di Hesus tur rudia mester dobla, di esnan riba tera y bao di tera, y cu tur lenga mester confesa cu Hesus Cristo ta Señor, pa e gloria di Dios Tata.
Awor nos ta confronta cu problema social, grandi caminda e famoso Placa y material cu hopi ta kere den dje, no por haci nada, pasobra e falta di respet, inmoralidad, perversidad, alcoholismo,adiccion, violencia , y bagamunderia cu hende hende ta bezig cune no tin pa placa pa combatie.
Seriedad y flata di respet, falta di temor di Dios, cherchamento di ley, y hasta bofon di Dios, a bira algo normal y hasta ora hende ta haci malo, y bay den rechaso di palabra di Dios, otro banda nan ta wordo aplaudi y apoya den tur forma.
Wak bon un situacion hopi facil y comun, si ley ta prohibi corre auto burachi, y tanto durante siman y fin di siman tin accidente, pasobra hende ta corre auto burachi, ta cherchamento di ley tin, ( No tin respet) y hopi biaha den accidente hende inocente ta wordo envolvi, kende si ta percura pa nan corre na tino den trafico.
Hesus a bisa: Loke ta sali for di hende, ta esey ta loke ta contamina hende. Pasobra for di paden, for di curason di hende, ta sali mal pensamento, fornicacion,ladronicia,matamento, adulterio,hechonan di cudishi y maldad,tambe engaño sensualidad,envidia,calumnia,orguyo,bobedad. Tur e maldadnan aki ta sali for di paden di y ta contamina hende.( Marco 7:20-23).
Pesey ta para scirbi den Isaias 5:20-21, Ay di esnan cu ta yama loke ta malo bon,y loke ta bon malo,loke ta scuridad lus,y loke ta lus scuridad, loke ta marga dushi, y loke ta dushi marga.Ay di esnan cu ta sabi den nan mes wowo, y prudente den nan mes bista.
E rebeldia cu ta aumenta bao di nos hubentud, y e falta di respet pa nan propio mayor, ta algo cu mester hala nos tur su atencion, pasobra asina problema social lo sigi aumenta, pasobra deber di tur mayor ta pa instrui nan yui den caminda di Señor.
E uso di alcohol y droga bao di nos hubentud , ta nifica un falta di disiplina y coreccion den cas di famia, pasobra cada mayor mester por duna testimonio di decensia y respet na nan yuinan, nan ta prome modelo cu nan yuinan mester sigi, pero ora nan mes no conoce e caminda di Berdad y Bida, cual ta e caminda di nos Señor Cristo Hesus, anto nos tur ta mirando locual nos ta cosechando.
Mientras tin un cantidad ta gradua y bay studia den exterior , tin un gran cantidad, ta cana cu , pensamento di gangster, pensamento di baron di droga, pensamento di bendedo di arma.
Y e palabra di Dios ta bisa nos den 2 Cronicanan 7:14 cu a yega e momento pa nos humiya nos mes y haci oracion na Dios.
Pasobra e solucion ta den man di nos Señor Hesus Cristo kende a bisa; No laga boso curason bira intrankil, kere den Dios, kere den Mi.(Juan 14:1).
Y tur loke boso pidi den Mi nomber, esey lo Mi haci, pa e Tata wordo glorifica den e Yiu, Si boso pidi algo den Mi nomber lo mi hacie.( Juan 14-13-14).
Sinceramente Pastor Marcel Balootje
