Ta para scirbi den Colosensenan 1:15-16-17 dunando un splicacion bon cla ken Cristo Hesus ta den nos bida: Y E ta e imagen di Dios invisibel, e primogenito di henter creacion.
Pasobra pa medio di dj’E tur cos a wordo crea,tanto den cielonan como riba tera,visibel y invisibel, sea trononan of dominionan of gobernante of autoridad tur cos wordo crea pa medio di dj’E y pa E.
E ta prome den tur cos , y den dj’E tur cos ta consisti. E tambe ta cabes di e curpa, y E ta e principio y e primogenito for di e mortonan, pa e mes por bin haña e prome lugar den tur cos.
Pasobra a grada e Tata pa henter e plenitud biba den dj’E.
Pa medio di e palabranan aki nos ta compronde dicon nos mester biba un bida, Cristo Centrico, caminda Cristo Hesus ta tur cos den nos bida, pasobra nos Salbacion , bida Eterna ta depende di Cristo Hesus, y nos sanacion y nos liberacion tambe.
Pesey ta para scirbi den Filipensenan 2:9-10-11 bisando lo siguiente : Pesey tambe Dios a hals’E te na halturanan y a dun”e nomber cu ta riba tur nomber , cu pa e nomber di Hesus tur rudia mester dobla, di esnan cu ta den cielo,y riba tera y bao di tera. Y tur lenga mester confesa cu Hesus Cristo ta Señor pa gloria di Dios Tata.
Un biaha mas ta wordo confirma cu ora nos tin Cristo Hesus nos tin tur cos, no tin ningun manera E y si awor tur hende mester sa cu no tin ningun pa compara cun’E.
Ta e momento pa bandona tur caminda di bruheria,santeria idolatria y bagamunderia y reconoce cu no
tin ningun manera Cristo Hesus.
Si un hende no ta kere den Cristo Hesus segun e palabra di Dios ta bisa den Juan 3:18 bon cla pa tur hende por saca nan conclucion: Esun cu ta kere den dj’E no ta condena, esun cu no ta kere ta condena caba, pasobra e no a kere den e Yiu unigenito di Dios. Esey ta mustra nos cu pa sali for di condenacion nos mester kere den Cristo Hesus y acepta Cristo Hesus como nos Señor y Salbador.
E a primiri di ta cu nos pa semper ( Mateo 28:20).
Tur cos mi por den Cristo kende ta dunami fortalesa ( Filipensenan 4:13).
Mi Dios lo provee tur loke boso tin mester segun Su rikesanan den gloria den Cristo Hesus ( Filipensenan 4:19).
Den Juan capitulo 14:13-14, Cristo Hesus ta splica na nos cu tur locual nos tin mester, ta cerca E mes nos tin di acudi bisando: Y tur locual boso pidi den Mi nomber, esey lo mi haci, pa E Tata wordo glorifica den e Yiu.
Si Boso pidi algo den Mi nomber lo Mi hacie.
Cristo Hesus a bisa tur locual cu nos tin mester esey ta nifica cu tur nos peticionnan ta wordo controla pasobra solamente cosnan cu ta den boluntad di Dios, ta e cosnan cu Cristo ta supli pa nos.
Cristo Hesus no ta kita nada for di ningun hende pa e duna na otro hende, absolutamente, ora bo ta desea cos di otro hende bo ta biba den egoismo, y Cristo no ta atende peticionnan egoista, pesey hopi biaha hende ta keda sin ricibi locual nan ta pidi.
Ora nos ta pidi na Dios, nos tin e pleno confiansa di ricibi locual cu nos ta pidi.
Sinceramente, Pastor Marcel Balootje
