Dialuna weganan di round di 16 caminda prome wega tabata entre Japan y Croatia.
Japan a clasifica na prome lugar di grupo E mientras Croatia a clasifica na di dos lugar di grupo F.
Croatia den mundial di Russia 2018 a keda como sub campeon di e torneo aki mientras cu Japan tabata tin un bon presentacion pero a keda elimina for di round di 16 pa Belgica.
Den prome mitar e japonesnan tabata hopi liher ariba tereno, creando bon oportunidad nan pa anota gol for di comienso di wega.
Tabata casi na final di prome mitar na di 43 minuut Japan ta bay ariba cu score di 1-0, gol anota pa Daizen Maeda, sigur un score mereci pa e japonesnan cu a pone hopi presion riba Croatia.
Prome mitar a bay den descanso cu score di 1-0 na fabor di Japan.
Den di dos mitar tabata parse cu e croatanan a haya un sacudi den camerin, nan a cuminsa e di dos mitar mas agresivo y apenas na di 55 minuut ta empata e wega cu bunita gol di cabez di Ivan Perisic.
Ningun di dos ekipo a logra anota mas gol den tempo regular y asina tambe a bay pa tempo extra.
Den tempo extra, parce cu ambos seleccion a dicidi di hunga mas cu cautela y tampoco a logra anota e gol di victoria.
No a keda otro pa e wga aki bay pa tironan for di punto penal y aki e heroe di wega a resulta keeper di Croatia, Dominik Livakovic kende a detene 3 tiro for di punto penal pa asina Croatia gana e tanda aki cu score di 3-1 y asina un biaha mas pasa pa cuart final mientras cu Japon un biaha mas ta keda elimina for di Copa Mundial den round di 16.
