E siman aki Aruba Tourism Authority (A.T.A.) conhuntamente cu Aruba Hotel and Tourism Association (AHATA) ta na New York pa e North American Marketing Retreat. Manera cu a bin ta sosode prome cu pandemia, e encuentro aki ta tuma luga den e mercado principal di Merca y tin como obhetivo pa evalua esfuersonan cu a tuma luga den 2023, como tambe pa delinea e strategia pa 2024.
Pa algun tempo caba, A.T.A. a bin ta haci tur preparacion necesario pa aña 2024. Encuentronan regular cu socionan, agencianan y miembronan di ekipo local y den e mercado ta un parti importante di esaki, como cu nan ta crea miho relacion entre partidonan y ta permiti partidonan pa scucha directamente di otro y crea dialogo tocante prioridadnan pa e aña venidero.
Topiconan cu a wordo trata durante e retreat a inclui entre otro tendencianan actual di biahe, e sorto di experencia cu bishitantenan ta buscando y tambe e oportunidadnan cu ta existi pa Aruba sigui mehora y desaroya. Por a conclui cu e biahero ta desea e.o.; un vacacion conviniente, ta desea di biaha su so, biaha den grupo cu ta consisti di solamente femenino, y mas.
A repasa e strategia di prijs di cambernan di hotel, canalnan di distribucion, pronostico di inventario, promedio di ocupacion y e corelacion entre inventario di camber compara cu e capacidad di asiento. Abase di e dialogo por a conclui cu tin oportunidad pa explora diferente punto di distribucion, pa inclui transparencia den prijs, maximalisa actividad y experiencia unico cu cada stakeholder por ofrece pa atrae e bishitantente. Hunto cu esaki, a elabora ariba proyecto actual di aeropuerto local cu lo asisti na e demanda di Aruba abase di capacidad di asiento.
E agencia di mercadeo creativo esta Big Village hunto cu e agencia di relacion publico, Zeno, a duna un presentacion y resumen tocante iniciativanan y campañanan sobresaliente den 2023. Alabes, con e informacion aki ta stimula e strategia pa 2024. Ademas a toca temanan importante manera e strategia di comunicacion, turismo sostenibel, niche marketing, y cooperacion entre operadornan di tour y stakeholder segun destinacion. Durante un dialogo interactivo a pone enfasis ariba nos ecosistema, experiencia culinario y e consistencia di esaki, y con nos hendenan ta keda un parti esencial den e experiencia di e bishitante. A elabora ariba e tema con pa maximalisa productonan existente pa crea e calidad di bishitante cu ta desea. Por a conlcui cu tin oportunidad pa crece aun mas den e area aki.
For di cada punto presenta durante e dos dianan di session, por a conta cu validez den contenido compara cu resultado di data colecta. Por menciona cu e puntonan aki ta puntonan di interes cu a wordo inclui den e plan di strategia 2024. Cu esaki, lo completa e plan y presupuesto pa 2024 cu lo wordo presenta no mas tarda cu prome di september di e aña aki.
CEO di A.T.A., Ronella Croes a finalisa bisando: “Pa 2024 ta spera cu e desaroyo di e mercado di Norte America lo ta uno stabiel compara cu 2023. E meta ta pa mantene e crecemento fuerte cu a mira den 2023. Ta anticipa cu Norte America lo mustra un crecemento di 11% na final di 2023 compara cu 2019, esaki ta sigur ariba e meta stipula pa 2023. Pa 2024 ta premira un posibel crecemento di 1% compara cu 2019.”
