Gerco Rijkers, General Manager di Algemeen Bouwbedrijf ALBO Aruba N.V. y Presidente di Werkgeversvereniging Arubaanse Bouwnijverheid (WAB), hunto cu Tomas Loefstop, Supervisor di Trabou di ALBO Aruba N.V., tambe a bishita e Parke di Mabon pa evalua e trabounan cu lo ehecuta diasabra 25 di juli, durante Dia Nacional pa Cuida Aruba. Durante e recorido, nan a inspecciona e parke y e diferente facilidadnan deportivo y recreativo. Ademas, nan a bishita diferente area den Bario Mabon cu tin mester di atencion. E meta tabata pa determina con e trabounan lo wordo reparti y cua ekipo, mashin y otro recurso lo ta necesario pa logra un resultado eficiente. Como parti di e preparacionnan, lo pone diferente baki na puntonan strategico den Mabon. Esaki lo duna e habitantenan oportunidad di deshaci di sushi grandi y otro material cu no ta uza mas.
Astrid Vries, Presidente di Comision di Desaroyo y Bienestar Bario Mabon, hunto cu e miembronan di e comision, ta haci un yamada na tur habitante: “Tin hopi trabou pa haci, pero si nos traha hunto, nos por haci un diferencia grandi. Mabon ta di nos tur. Ban sali for di cas riba 25 di juli y mustra cu nos ta cla pa cuida nos propio bario. Cada persona cu pone man na obra ta haci un diferencia. Hunto nos por logra cu Mabon bira un bario cu nos tur por ta orguyoso di dje.” Riba diasabra 25 di juli, WAB lo uni forsa cu Marina Real, e habitantenan di Mabon, boluntario y diferente partner pa duna e bario e atencion cu e merece. Ora un bario keda limpi, ta importanta pa pueblo sigui cuid’e y manten’e cu e mesun orguyo cu pueblo sa mustra ora ta eherce trabou boluntario manera lo bolbe haci riba e Dia Nacional Pa Cuida Aruba. “Ban mustra cu Mabon ta para pa cuida su bario. Hunto nos por haci Bario Mabon un ehempel pa tur otro bario na Aruba. E compromiso no ta termina riba 25 di juli. E dia ey ta solamente e cuminsamento. E ta den man di nos tur pa sigui mantene Mabon limpi, pa asina e resultado di nos esfuerso no bai perdi, sino bira un fuente di orguyo pa nos comunidad.” Vries a remarca.
Mainta den un bishita mas trempan na e mesun area di Mabon Prome Minister Mike Eman a expresa su satisfaccion cu Dia Nacional pa Cuida Aruba, un iniciativa cu su Gobierno a lansa, ta bira realidad. Awor cu 25 di juli ta yega mas cerca, e comunidad di Mabon ta orguyoso di forma parti di e gran dia nacional aki. “Ta bon pa mira con Gobierno, sector priva, Marina Real y e comunidad ta uni forsa pa duna Mabon un comienso nobo. Esaki ta mustra cu, ora nos traha hunto, nos por logra cos grandi pa nos isla y fortifica nos sentido di responsabilidad comparti pa cuida Aruba.”
Dia Nacional pa Cuida Aruba no ta solamente pa haci limpiesa na e parke. E ta un oportunidad pa cada famia haci su cas y cura limpi, saca tur loke cu no ta sirbi mas, bari foyo, corta yerba y yuda cu limpiesa den e areanan publico unda pueblo ta pasa tur dia. Hunto por haci un parke limpi, e camindanan, e aceranan, nos mondinan y tur skina di nos barionan. Cu e esfuerso di cada habitante, hasta Mabon por bira un bario completamente limpi y bunita.
