ORANJESTAD – Na aña 2014, Aruba Tourism Authority a amplia su structura como organisacion y di un asina yama ‘Destination Marketing Organization’ (DMO) a bay pa un ‘Destination Marketing & Management Organization’ (DMMO). Esaki conforme e di dos ‘business plan’ di A.T.A. unda a conclui cu Aruba Tourism Authority mester ta mas presente como partido den e desaroyo di nos producto turistico.
E trabou desplega a inclui diferente estudio entre otro un plan di desaroyo di producto turistico cual plan ta conoci bao e nomber di ‘Cu Mira pa Futuro’, un estudio di e capacidad di carga di nos destinacion y un estudio di diferente‘ niche’,e asina yama ‘niche roadmap’.
Na 2014 A.T.A. a introduci tambe un modelo di turismo cu ta referi na dje como e modelo di ‘High Value – Low Impact’.
KICO ESAKI TA ENCERA?
E modelo di ‘High Value – Low Impact’ ta un desaroyo turistico cu ta poni den balansa:
- E contribucion economico pa medio di turismo, cu ta e meta principal cu turismo mester sirbi;
- Proteccion y conservacion di nos medio ambiente, y pues recursonan natural tambe;
- Calidad di bida di nos residentenan, turismo ta parti di nos cultura / di nos biba na Aruba y e mester trece balor agrega pa nos residentenan cu no ta den forma monetario so;
- E balansa mester trece cu n’e tambe un experiencia di calidad pa nos turistanan.
E programa ‘Aruba Signature Experiences’ ta cuadra den e desaroyo turistico duradero, unda kier stimula creacion di productonan y servicionan nobo di high value pa nos bishitantenan y comunidad y di low impact riba nos medio ambiente.
ARUBA SIGNATURE EXPERIENCES
E meta ta pa lansa ‘Signature Experiences’ na aña 2022. Pues esnan interesa lo wordo educa, getrain, ta ricibi guia y ta duna instrumento pa yuda formula y despues pa entrega un business plan cu ta enfoca riba e areanan di romance, bienestar (esta wellness) y actividadnan activo. Lo evalua proposicionnan a base di criterianan concreto y di esaki lo scoge un maximo di 5 proposicion cu por goza di un acuerdo cu Qredits pa cu financiamento, pero tambe di parti di oficina di turismo lo goza di consehonan y guia personalisa.
NICHE TOURISM
E concepto di stimula desaroyo di producto / servicionan nobo den e areanan di romance, bienestar y actividad activo ta entre otro e resultado di e estudionan di capacidad di carga y di e niche roadmap.
A.T.A. ta desea pa negociantenan existente y nobo sigui e linea di pensamento aki, ta p’esey tambe a introduci un guia e nichenan di romance, bienestar (esta wellness) y actividadnan activo. Esakinan ta obtenibel riba www.aruba.com/registra.
Aruba Tourism Authority ta invita e comunidad di Aruba pa participa y pa mas informacion y registracion por check www.aruba.com/registra.
