Diahuebs mainta varios cliente di Aruba Bank a bati alarma cu nan cuenta a wordo debita pa sumanan di Afl. 900.00, cual suma nan no a usa, ni cumpra nada. Yamadanan di telefon a cuminza drenta na e banco un tras di otro. Clientenan a bira nervioso. Algun cliente nan cuenta a keda na 0.00. E banco mesora a cuminza un investigacion. Mesora e departamento di comunicacion cu publico a emiti un comunicado, pidiendo pa tur hende keda trankilo, ya cu e banco ta den investigacion. Poco mas despues e banco a bisa cu nan a suspende tur compra online temporalmente. E uso via ATM ta keda den uso normal. Despues Aruba Bank a pidi 24 Ora pa nan pone tur placa bek riba cuenta di nan clientenan. Esaki sigur tabata un sla pa e banco, cu ta cumpli cu standardnan halto di seguridad, pero toch por a mira un hackeo enorme tuma lugar, unda varios cliente a keda perhudica temporalmente.
Basta tempo pasa a tuma lugar un hackeo na Arubus, riba dia 11 di juli 2014, unda un suma grandi a bay China.
Tambe a tuma lugar un hackeo na hospital, unda aparentemente Rusianonan a lock e data di hospital y tabata kier a cobra 2 miyon dollar.
Entodo caso, por bisa cu Aruba Bank a mustra liderasgo, dor di actua rapido y eficiente, pidi pa trankilidad y resolve e issue.
Aruba Bank ta un di e mihor banconan na Aruba, cu tin un tarheta cu ta ATM y alaves Credit Card, unda bo por haci compras directo na Amazon of cualkier parti na Merca. Su tarheta di multiple uso ta esun di mas mihor na Aruba, segun ecnuesta di varios clientenan. SOLO DI PUEBLO ta desea Aruba Bank forsa y pasenshi pa resolve e probelma.
