Materialismo ta pica, materialismo ta idolatria, materialismo ta pone hende stima cos mas cu Dios, y ta pone mas atencion na locual cu nan tin, y ta ninga nan amor pa prohimo.
Ta duro pa mira con e mundo ta bira dia pa dia ,mas materialista, hende ta bisa cu nan stima otro, pero despues ta sali na cla cu tin otro interes den tapara, y esey ta e material cu e persona tin.
Asina cu dos hende ta casa, cu nan ta pone nan bienes nan separa, no tin amor, materialismo a presenta, pasobra ora un persona ta stima di berdad, e ta confia Dios pa nan crecemento no pa nan caida.
Tin cosnan cu ta duro pa nos compronde con hende ta laga material cumpra y domina nan bida, y nan ta pensa cu semper nan lo ta rico, semper orguyoso, nunca nan tin mester di ningun hende, y nan ta lubida cu ora cu nan muri nan no ta bay cu nada.
Pasobra amor pa placa ta rais di tur sorto di maldad, y algun hende, door di desea esaki,a desvia for di fe,y a traspasa nan mes cu hopi dolor. ( 1 Timoteo 6:10).
Y e a bisa tene cuidao y warda boso di tur golosidad, pasobra bida di hende no ta consisti di e abundancia di e cosnan cu e tin.( Lucas 12:15).
Esun cu ta stima placa, lo no keda satisfecho cu placa,ni esun cu ta stima abundancia,cu su entrada,Esaki tambe ta vanidad.( Eclesiastes 5;10).
Manera e a sali sunu for di barica di su mama, asina e lo bolbe mescos cu e a sali. E lo no hiba nada, di e fruta di su trabao, cu e por carga den su man. ( Eclesiastes 5:15).
Mihor djis un tiki, cu e temor di Senjor,cu gran tesoro y problema hunto cune.(Proverbionan 15:16).
Si nos wak e relacionannan amoroso awendia, hopi ta basa riba material, hopi no ta basa riba seriedad, fieldad y amor berdadero.
Tin un sistema awendia cu un pareha hoben ta bisa cu nan ta frei y caba nan ta biba cu otro, pasobra asina tin cumpramento di cos hunto y tin relacion sexual den e asunto ta bibamento tin, pesey tambe ora nan ta kibra for di otro ta hopi drama tin pasobra e nivel di bida ta baha, y tur hende ta sa cu e amor tabata materialista.
Como hoben bo no tin cu bende bo curpa pa material, para riba bo curpa, sea serio y puro y mas cu tur cos decente y asina pone hende hanja respet pa bo.
Laga boso karakter ta liber di amor pa plaka y sea contento cu locual cu bo tin. ( Hebreonan 13:5).
Mi di berdad santidad acompanja pa contentamento ta di gran ganashi, pasobra nos no a trece nada den e mundo,y nos no por hiba nada for di dje tampoco.( 1 Timoteo 6:6-7).
Tin hopi confusion amoroso ta bay rond awedia, pasobra ora un mucha homber tin cu mantene su frei cu ta traha tur dia mescos cune, e no sa si su amor ta berdadero of materialista, e no sa si e chick ta cune of e chick tey pa motibo di e cosnan cu e ta hanja of vice versa.
Amor mester ta limpi di materialismo, hasta den matrimonio, e trato mester ta igual henter luna, no por tin trato di dulsura fin di luna, y durante luna tin trato diferente.
Materialismo ta pica , y esnan cu ta practica materialismo den cualkier area di nan bida , ta practicando pica.
Dios libra nos for di bida materialista. Sinceramente, Pastor Marcel Balootje
