E reino di scuridad ta wordo indentifca y reconoce como e reino di mentira, e reino di desorden, e reino di falsedad, e reino di inmoralidad, y trocemento di e palabra di Dios,
No ta cos di haci wega cune, pasobra ta facil pa drenta y participa, sin sa cu bo ta den e wega especialmente ora bo ta apoya Maldad . Malicia y Inmoralidad.
Ora bo ta tuma malo haci bon, y tuma bon haci malo.
Den 2 Timoteo 3:1-5 Pablo ta bisa na Timoteo, cu alavez e ta papiando cu nos tur, cu den e ultimo dianan lo bini tempo trabahoso, y esey ta locual nos ta bibando aden, y nos ta experiencia e aumento di scuridad riba e mundo aki.
Ta tempo pa tur mayor wak nan yiu, ta tempo pa cada tata vigila nan cas, ta tempo pa haci mas oracion cu nunca den famia pasobra nos lucha no ta contra carni y sanger.( Efesionan 6:12)
Nos tin representante di reino di scuridad ta biba hunto cu nos, manera Hesus mes a bisa bon cla den Mateo 13:37-39.
Y nos tin cu papia sin miedo, pasobra den Juan 8:42-44 Hesus ta identifica nan bisando: Si Dios tabata boso Tata , boso lo a stima Mi.pasobra Mi a sali y a bini for di Dios, pasobra mi no a bin for di mi mes, ma ta E a manda Mi . Pakico boso no ta compronde loke Mi ta bisa? Ta pasobra boso no por tende Mi palabra.
Boso ta di boso tata e diabel, y boso kier haci deseonan di boso Tata, e tabata un matado for di principio, y no ta para den e berdad, pasobra no tin berdad den dje. Ki ora cu e papia ta mentira e ta papia for di su mes naturalesa, pasobra e ta un ganjado y tata di mentira. Ma pasobra Mi ta papia berdad boso no ta keremi.
Den Romanonan 1:18-32 e palabra di Dios ta splica nos bon cla locual ta e furia di Dios contra humanidad, pasobra sabiendo e berdad di Dios hende kier troce e berdad, pesey Dios a laga Su berdad bon cla pa nos , pa asina ningun hende por tin excuus.
Pero toch nos ta mira con hende ta aparta for di e berdad y nan ta kere den tur sorto di fabula, cosnan cu ta diabel a inventa, y cu nunca lo bira berdad, y asina bira participe den e mundo di scuridad, pasobra nan a ninga di reconoce Dios, y Dios na su turno a entrega nan na un mente perverso.
Apesar di e plan di salbacion cual ta para scirbi den Juan 3:16 – 20, y di e aviso hopi serio cu ta para scirbi den Juan 3:36 toch hende ta keda mors cu e reino di scuridad.
Pero Senjor Dios sa tambe con pa rescata e santonan for di tentacion y con pa tene e inhustonan bao di castigo pa e dia di huicio,specialmente esnan cu ta sigi e carni den su deseonan corupto y ta desprecia autoridad di Dios.
Hopi hende ta bandona e caminda corecto y ta dwaal den caminda di maldad, siguiendo nan propio pasionan cu curason yen di golosidad, cu wowo yen di adulterio y cu nunca kier stop di haci pica.
E ta para scirbi cu tur claridad den Mateo 24:12-13 bisando : Pa motibo cu inikidad lo aumenta, amor di hopi lo fria,ma esun cu perservera te na fin, esey lo ta salba.
Pesey tene cuidao cu e reino di scuridad.
Keda para fiel y firme den Senjor.
Sinceramente, Pastor Marcel Balootje